Кореяда өмір сүру жөніндегі нұсқаулық

Корея Республикасы(Republic of Korea) немесе қысқаша «Корея(Korea)» деп те атайды.

Азия континентінің солтүстік-шығысындағы Корей түбегінде орналасқан Оңтүстік Кореяның ауданы 100,188.1 km² құрайды, бұл Оңтүстік пен Солтүстік Кореяның жалпы аумағының 45% құрайды, оған Корей түбегі мен оның аралдары 221,000 km² кіреді. Корей түбегінің ауданы Камбоджадан (181,035 km²) сәл үлкен және Филиппин (300,000 km²), Вьетнам (331,210 km²) және Жапонияның (377,915 km²) шамамен үштен екі бөлігіндей болып саналады. Солтүстік және Оңтүстік Кореяны қамтитын Корей түбегінің солтүстік-батысында орналасқан Ялу өзені Қытаймен шектессе, солтүстік-шығысындағы Думан өзені Қытай және Ресеймен шектеседі. Корея үш жағынан теңізбен қоршалған: батысында Батыс теңізі, шығысында Шығыс теңізі, оңтүстігінде Оңтүстік теңізі бар. Корей түбегінің оңтүстік және батыс бөліктері негізінен жазық, ал шығыс және солтүстік бөліктері таулы. Корей түбегіндегі ең биік тау – Бэкду тауы (2,744 m). Солтүстіктегі Гэма үстірті «Кореяның шатыры» деп аталады, ал түбектің шығыс жағалауында орналасқан Тэбек таулары Бэкдудеган деп те аталады.
Атақты аралдарға Чеджу аралы, Годже аралы, Джин аралы және Уллың аралы жатады, Чеджу аралы мен Уллың аралы жанартау әсерінен пайда болған. Сары теңіз бен оңтүстік теңіз жақта риас типті жағалаулар дамыды, сондай-ақ түбектің жан-жағындағы барлық теңіздердің толқын деңгейлері әртүрлі болып келеді(Анықтама: жер және көлік министрлігі)

Кореяның ұлттық туы Тхэгукки — ақ түсті фонда орналасқан ортасында тхегук белгісінен және бұрыштарында бейнеленген төрт триграммадан (геон (☰), гон (☷), гам (☵) және ри (☲)) тұрады.
Тхэгукки туындағы ақ фон жарық мен тазалықты, сондай-ақ дәстүрлі түрде корей халқының бейбітсүйгіш мінезін білдіреді. Ортасында орналасқан тхэгук символы инь (көк) мен янның (қызыл) үйлесімін білдіреді. Бұл — ғаламдағы барлық нәрсе инь мен янның өзара әрекеттесуі арқылы пайда болып, дамитынын бейнелейтін табиғи ақиқат. Бұрыштарындағы төрт триграммадағы қысқа және ұзын сызықтардың үйлесімі инь мен янның бір-бірін қалай түрлендіріп, дамытатынын көрсетеді.
Ғаламдағы барлық нәрсенің ішінде геон (☰) — аспанды, гон (☷) — жерді, гам (☵) — суды, ал ри (☲) — отты бейнелейді. Бұл төрт триграмма ортасындағы тхэгук символымен біртұтас үйлесім құрайды. Осылайша, Тхэгукки туы ежелден бері корей халқы күнделікті өмірінде жиі қолданған тхэгук белгісін негіз ете отырып, ғаламмен үндесе отырып үнемі жасампаздық пен өркендеуге ұмтылатын корей халқының мұрат-мақсатын бейнелейді. (Дереккөз: Ішкі істер және қауіпсіздік министрлігі)

Бұрыннан біздің халықтың сүйіспеншілігіне ие болған Мугуңхуа(шарон раушан гүлі) еліміздің символы болып табылады, оның «мәңгілік гүлдеп, қайта гүлдеп, өшпейтін гүл» деген мағынасы бар. Ескі жазбаларда корей халқы шарон раушан гүлін Кочосоннан бастап аспан елінің гүлі ретінде бағалаған, ал Силланың тұрғындары өздерін «гынхуа хяң(槿花鄕 : Мугуңхуаның елі)»деп атаған. Қытайда біздің елімізді ежелден бері «Мугуңхуасы гүлдеп, қайта гүлдейтін парасатты ел» деп дәріптеген.

Осылайша ұзақ уақыт бойы біздің халықпен бірге келе жатқан шарон раушан гүлі, Чосон дәуірінің соңғы кезеңінде “Мугуңхуа үш мың миль, әдемі тау мен жер” деген ән сөзіне енгеннен кейін, одан әрі халықтың сүйіспеншілігіне ие болды. Мугуңхуаға деген біздің халықтың сүйіспеншілігі жапон оккупациясы кезінде де жалғасты, ал жеңіс күнінен кейін Мугуңхуа ресми түрде елдің мемлекеттік гүлі болып тағайындалды. (Анықтама: Ішкі істер және қауіпсіздік министрлігі).

Бүгінгі күні танымал болып отырған мемлекеттік әнұранның мәтіні шетелдік басқыншылардың елге қауіп төндірген 1907 жылы әзірленген, отаншылдық пен адалдық, тәуелсіздік сезімін арттыру мақсатында жазылған. 1948 жылы Корея үкіметі құрылғаннан кейін қазіргі мәтінмен бірге Ан Ик Тенің 1935 жылы жазған әнұраны мемлекеттік іс-шараларда қолданылып келді.
Содан бері бұл әнұран мектептердің оқулықтарында жарияланып, елге кеңінен тарала бастады, қазіргі уақытта біздің халықтың арасында ғана емес әлемнің әр елінде Кореяның мемлекеттік әні ретінде кеңінен танымал.

Кореяның жалпы халқының саны 51,780,579 адам (2020 жылғы тұрғын үй популяциясының жалпы саны, Статистика комитеті), әлемде халық саны бойынша 28-ші орын алады, халық тығыздығы 516 адам/км² (Жер және көлік министрлігінің картографиялық статистика туралы жылдық есебі, Статистика комитетінің болашақ халық есебі) халықтың тығыздығы бойынша әлемде 23-ші орында.

Кореяның ЖІӨ 1 трлн 810,2 миллиард долларды құрайды, әлемде 10-шы орында, жан басына шаққандағы ЖІӨ 34,983.70 доллар. (2021 жыл, Корей банкі).

Корей үкіметі президенттік жүйені қабылдаған, президент үкіметтің басшысы ретінде заңнамалық негізде барлық орталық әкімшілік органдарының басшыларын басқарып, бақылайды. Премьер-министр президенттің бұйрығы бойынша барлық орталық әкімшілік органдарының басшыларын басқарып, бақылайды. Төмендегі кестеде Кореяның үкіметтік ұйымы 19 министрлік, 3 агенттік, 20 басқарма және 6 комиссиядан тұратыны көрсетілген. (2024.6.27. мәлімет). Бұның ішіндегі 19 әкімшілік министрлік төмендегі жұмыстармен айналысады:

Корея мемлекетінің аумағы 17 жергілікті әкімдік пен 226 базалық автономиялық әкімшілікке бөлінеді. Жергілікті әкімдікке 1 мегополис қала, 6 үлкен қала, 1 арнайы әкімшілік қала, 6 облыс, 3 арнайы әкімшілік облыс кіреді. Жергілікті өзін-өзі басқару органдары 75 автономиялы қала, 82 уездер (кун), 69 автономиялық муниципалды аймақтарды(джачигу)қамтип, әр жергілікті өзін-өзі басқару органы төменгі деңгейдегі басқару бірліктері болып саналатын Ып, Мён, Донг саны жалпы 3,491 бірлікті құрайды. (2023 жыл, 31-желтоқсанда жасалған мәлімет)