ကိုရီးယားနိုင်ငံတွင်းနေထိုင်မှုလမ်းညွှန်

ကိုရီးယားအစိုးရနှင့် ပုဂ္ဂလိကအဖွဲ့အစည်းများမှ ကိုရီးယားဘာသာစကား သင်တန်းများ၊ ကိုရီးယားယဉ်ကျေးမှု သင်တန်းများ၊ ဆွေးနွေးမှုများစသည့် နိုင်ငံခြားသွေးနှော မိသားစုနှင့် နိုင်ငံခြားသားများ၏ ကိုရီးယားနိုင်ငံတွင်း နေထိုင်မှုကို ကူညီပေးသော ဝန်ဆောင်မှုများ ပေးလျက် ရှိပါသည်။ အထူးသဖြင့် ဘာသာစကား အခက်အခဲရှိပြီး၊ ကိုရီးယားယဉ်ကျေးမှုနှင့် မရင်းနှီးသေးသည့်အတွက် ကိုရီးယားလူမျိုးများနှင့် ဆက်ဆံရန် ခက်ခဲသည့် ရောက်ခါစ ကာလများတွင် နိုင်ငံခြားသွေးနှောမိသားစုနှင့် နိုင်ငံခြားသား အထောက်အကူပြုဌာနများမှတစ်ဆင့် အမျိုးမျိုးသော ဝန်ဆောင်မှုများကို ရယူခြင်းသည် အင်မတန် အထောက်အကူပြုပါသည်။

ကိုရီးယားနိုင်ငံတွင်း နေထိုင်ရေး အဆင်ပြေချောမွေ့စေရန်နှင့် ကိုရီးယားယဉ်ကျေးမှုကို နားလည်စေရန် ကိုရီးယားဘာသာစကားကို သင်ယူရန် လိုအပ်ပါသည်။ ထို့ကြောင့် ကိုရီးယားနိုင်ငံတွင် နိုင်ငံခြားသားများ ကိုရီးယားဘာသာစကားကို အခမဲ့ သင်ယူနိုင်သည့် ဌာနများစွာ ရှိပါသည်။ နိုင်ငံခြားသွေးနှောမိသားစု အထောက်အကူပြုစင်တာ၊ နိုင်ငံခြားသားအလုပ်သမားများ အထောက်အကူပြုစင်တာ၊ ကိုရီးယားဘာသာစကား သင်တန်းကျောင်းများ စသည့် နေရာများသည် နိုင်ငံခြားသားများအတွက် ကိုရီးယားဘာသာစကား သင်တန်းများ ဖွင့်လှစ်ကာ သင်ကြားပေးနေသည့် အဓိက ဌာနများဖြစ်ပါသည်။

ယဉ်ကျေးမှုနှင့် နေထိုင်မှုပုံစံ ကွာဟခြင်းကြောင့် ဖြစ်ပေါ်လာ‌သော ကိုရီးယားနိုင်ငံတွင်း နေထိုင်သွားလာမှု အခက်အခဲများကို ကျော်လွှားနိုင်ရန် ကိုရီးယားလူနေမှုဘဝနှင့် ယဉ်ကျေးမှုကို သင်ယူနိုင်သော ပရိုဂရမ်များ ရှိပါသည်။ ယဉ်ကျေးမှုစုံအကြောင်း သိကောင်းစရာများ၊ ဥပဒေနှင့် လူ့အခွင့်အရေး သင်တန်း၊ အိမ်ထောင်ပြုခြင်းနှင့် မိသားစုအကြောင်း သိကောင်းစရာ၊ ကိုရီးယားလူ့ဘောင်အဖွဲ့အစည်းနှင့် အသားကျစေရန် သင်တန်းများစသည့် သင်တန်းပို့ချချက်များနှင့် လက်တွေ့ကွင်းဆင်းလေ့လာစေသော နည်းလမ်းများကို တစ်ပြိုင်တည်း ဆောင်ရွက်ပေးလျက် ရှိပါသည်။

ကိုရီးယားနိုင်ငံသည် အိမ်တိုင်းနီးပါး ကိုယ်ပိုင် ကွန်ပျူတာများ အသုံးပြုလျက် ရှိပြီး၊ အင်တာနက် ဆက်သွယ်မှုသည်လည်း အင်မတန် ကောင်းမွန်သော နိုင်ငံဖြစ်ပါသည်။ အင်တာနက် အသုံးပြုခြင်းအားဖြင့် သတင်းအချက်အလက်များစွာ ရရှိနိုင်ပြီး၊ အင်တာနက်ဘဏ်ကင်း၊ ရုံးလုပ်ငန်းဆောင်တာများ စသည်တို့ကို အဆင်ပြေစွာ ဆောင်ရွက်နိုင်ပါသည်။ ထို့အတွက်ကြောင့် နိုင်ငံခြားသွေးနှောမိသားစု အထောက်အကူပြုစင်တာ၊ နိုင်ငံခြားသားအလုပ်သမားများ အထောက်အကူပြုစင်တာ စသည့် ဌာနများမှ အင်တာနက်ဖြင့် အချက်အလက် ရှာဖွေနည်းနှင့် ပရိုဂရမ် အမျိုးမျိုး အသုံးပြုနည်းများကို သင်ကြားပေးသော အိုင်စီတီသင်တန်း ပရိုဂရမ်များကို ဖွင့်လှစ်သင်ကြားပေးလျက် ရှိပါသည်။

ကိုရီးယားနိုင်ငံတွင် နေထိုင်နေသော နိုင်ငံခြားသားများ၏ အခက်အခဲများကို ဆွေးနွေးပေးပြီး၊ ပြဿနာ ဖြေရှင်းနည်းများကို ကူညီပေးသော ဆွေးနွေးခြင်း ဝန်ဆောင်မှုများ ပေးလျက်ရှိပါသည်။(မိသားစုရေးရာဆွေးနွေးခြင်း၊ အလုပ်ဆိုင်ရာဆွေးနွေးခြင်း၊ နေထိုင်ခွင့်ဆိုင်ရာ ဆွေးနွေးခြင်း၊ ဥပဒေရေးရာဆွေးနွေးခြင်း စသည်)