ကိုရီးယားနိုင်ငံတွင်းနေထိုင်မှုလမ်းညွှန်

လုပ်ငန်းခွင်ထိခိုက်မှု လျော်ကြေးအာမခံသည် နိုင်ငံတော်က လုပ်ငန်းရှင်ထံမှ အာမခံကြေး ကောက်ခံပြီး ၎င်း ရန်ပုံငွေဖြင့် လုပ်ငန်းရှင်ကိုယ်စား လုပ်ငန်းခွင်ထိခိုက်မှု ကြုံရသော အလုပ်သမားထံ လျော်ကြေးပေးသည့် စနစ်ဖြစ်ပြီး၊ အခြေခံအားဖြင့် အလုပ်သမားခန့်ထားသော လုပ်ငန်း သို့မဟုတ် လုပ်ငန်းခွင် အားလုံးတွင် အကျုံးဝင်ပါသည်။ အလုပ်သမားမှ လုပ်ငန်းခွင်ထိခိုက်မှု ကြုံရသည့်အခါ အလုပ်သမားဖူလုံရေး ကော်ပိုရေးရှင်းသို့ လုပ်ငန်းခွင်ထိခိုက်မှုဆိုင်ရာ လျော်ကြေးအား လျှောက်ထားလျှင် ကော်ပိုရေးရှင်းမှ စစ်ဆေးမှုအပြီးတွင် လုပ်ငန်းခွင်ထိခိုက်မှုအာမခံ ခံစားခွင့်ကို ထုတ်ပေးပါသည်။

လုပ်ငန်းခွင်ထိခိုက်မှု လျော်ကြေးအာမခံဥပဒေတွင် အကျုံးဝင်သည့် လုပ်ငန်း သို့မဟုတ် လုပ်ငန်းခွင်တွင် အလုပ်လုပ်နေသော အလုပ်သမားသည် အလုပ်ကြောင့် ထိခိုက်မိခြင်း၊ ရောဂါရခြင်း၊ မသန်စွမ်းဖြစ်ခြင်း၊ သေဆုံးခြင်းများ ဖြစ်ပွားပါက အလုပ်သမား သို့မဟုတ် ၎င်း၏ မိသားစုမှ လျော်ကြေးခံစားခွင့်ကို လျှောက်ထားနိုင်ပါသည်။

ဆေးကုသမှုခံစားခွင့်လျှောက်လွှာ ဖြည့်သည့်အခါ ဖြစ်နိုင်ပါက ထိခိုက်မှု အကြောင်းအရာနှင့် နေ့ရက်အချိန် စသည်တို့ကို အသေးစိတ် တိကျစွာ ဖြည့်ရပါမည်။ အကယ်၍ မိမိ ဆေးကုသမှု ခံယူနေသည့် ဆေးရုံသည် လုပ်ငန်းခွင်ထိခိုက်မှုအာမခံ ဆေးရုံဆေးခန်းဖြစ်ပါက အာမခံလျှောက်ပေးရန် အကူအညီတောင်းခံနိုင်ပါသည်။

မတော်တဆမှု ကြိုတင်ကာကွယ်ရေးတွင် ပထမ အရေးကြီးဆုံးအချက်မှာ လုပ်ငန်းခွင်နှင့် အနီးအနားရှိ လူသွားစင်္ကြံလမ်းအား မကြာခဏ သန့်ရှင်းရေးလုပ်ခြင်း၊ ပစ္စည်းများ သေသပ်စွာ ထားသိုခြင်းတို့ ဖြစ်ပါသည်။ လူသွားစင်္ကြံလမ်းရှိ အနှောင့်အယှက်ဖြစ်စေသည့် ပစ္စည်းများ အားလုံးကို ရှင်းလင်းပြီး သွားရေးလာရေးတွင် အခက်အခဲမဖြစ်စေရန် လုပ်ဆောင်ရမည် ဖြစ်ကာ၊ ချောနေသည့် နေရာ ရှိမရှိကို အမြဲတစေ စစ်ဆေးရပါမည်။ အောက်ပါတို့မှာ လုပ်ငန်းခွင် အားလုံးတွင် မဖြစ်မနေ လိုက်နာရမည့် ဘေးကင်းလုံခြုံရေးစည်းကမ်းများ ဖြစ်ပါသည်။