ကိုရီးယားနိုင်ငံတွင်းနေထိုင်မှုလမ်းညွှန်

ကိုရီးယားနိုင်ငံသည် ဝင်ငွေနှင့် ပိုင်ဆိုင်မှု စသည်တို့အပေါ် မူတည်ပြီး လစဉ် သတ်မှတ်ပမာဏအတိုင်း အာမခံကြေး ပေးဆောင်ရသည့် ကျန်းမာရေးအာမခံစနစ်ကို ကျင့်သုံးလျက်ရှိပါသည်။ ကျန်းမာရေးအာမခံဝင်ထားပါက နာမကျန်းဖြစ်သည့်အခါ သို့မဟုတ် ကလေးမွေးဖွားသည့်အခါ ကုန်ကျစရိတ် သက်သက်သာသာဖြင့် ဆေးရုံဆေးခန်းများကို အသုံးပြုနိုင်ပါသည်။ ထို့အပြင် ပုံမှန် ကျန်းမာရေးစစ်ဆေးခြင်းများ ပြုလုပ်နိုင်ပါသည်။ နိုင်ငံသား အားလုံးသည် ကျန်းမာရေးအာမခံကို မဖြစ်မနေ ဝင်ထားရမည်ဖြစ်ပြီး၊ ဆေးကုသစရိတ်ခံစားခွင့်ရသည့်သူများ မပါဝင်ပါ။
ကျန်းမာရေးအာမခံဝင်ထားသူများကို အလုပ်မှတစ်ဆင့် ကျန်းမာရေးအာမခံသွင်းနေသူများနှင့် ဒေသကျန်းမားရေးအာမခံသွင်းသူများဟူ၍ ခွဲထားပါသည်။ လုပ်ငန်းခွင် အားလုံးတွင် အလုပ်လုပ်နေသော အလုပ်သမားများနှင့် အလုပ်ရှင်များ၊ အစိုးရဝန်ထမ်းနှင့် ပညာရေးဝန်ထမ်းများသည် အလုပ်မှတစ်ဆင့် ကျန်းမာရေးအာမခံသွင်းနေသူများ ဖြစ်ပါသည်။ အလုပ်မှတစ်ဆင့် ကျန်းမာရေးအာမခံသွင်းနေသူများသည် များသောအားဖြင့် အိမ်ထောင့်တာဝန်ကို ယူနေသောသူများဖြစ်ပြီး အမျိုးသားကျန်းမာရေးအာမခံဥပဒေ ပြဋ္ဌာန်းချက်အရ သတ်မှတ်ထားသော စံနှုန်း(ဝင်ငွေ၊ ပိုင်ဆိုင်မှု၊ မှီခိုသူ) အားလုံးနှင့် ပြည့်စုံပါက ကာယကံရှင်မှ အကြောင်းကြားခြင်းဖြင့် မှီခိုသူအား စာရင်းထည့်သွင်းနိုင်ပါသည်။ အလုပ်မှတစ်ဆင့် ကျန်းမာရေးအာမခံသွင်းနေသူများနှင့် ၎င်းတို့၏ မှီခိုမိသားစုများမှ လွဲ၍ ကျန်သူများမှာ ဒေသကျန်းမာရေးအာမခံစာရင်းသွင်းသူများ ဖြစ်ပါသည်။ အလုပ်မှတစ်ဆင့် ကျန်းမာရေးအာမခံသွင်းနေသူများဖြစ်ပါက ကုမ္ပဏီမှ ရသော လစာဆိုင်ရာ အာမခံကြေးသည် ကုမ္ပဏီမှ အာမခံကြေး၏ 50%နှင့် ကျန် 50%ကို ကာယကံရှင်မှ ကျခံရပြီး၊ လုပ်ခလစာ မဟုတ်သော သီးခြားဝင်ငွေရှိပါက တစ်နှစ်လျှင် ဝမ် သိန်း 200 ကျော်ပါက၊ ယင်း သီးခြားဝင်ငွေ စုစုပေါင်းထဲမှ ဝမ် သိန်း 200ကို နုတ်ပြီးနောက် လစဉ်ပျမ်းမျှဝင်ငွေတွက်ပြီး ၎င်းပမာဏကို ကျန်းမာရေးအာမခံနှုန်းထားဖြင့် မြှောက်ထားသော အာမခံကြေးကို ကာယကံရှင်မှ အလုံးစုံ ကျခံရပါသည်။ ကျန်းမာရေးအာမခံ ဝင်ထားသောသူသည် ဆေးရုံတွင် ဆေးကုသမှု ခံယူသည့်အခါ အမျိုးသားကျန်းမာရေးအာမခံဌာနမှ ဆေးကုသစရိတ်ထဲမှ တချို့တစ်ဝက်ကို ကျခံပေးပြီး၊ ဆေးရုံ၊ ဆေးခန်းနှင့် တိုင်းရင်းဆေးခန်းများတွင် စမ်းသပ်ခြင်း သို့မဟုတ် ဆေးကုသခြင်းများကို အကုန်အကျ သက်သာစွာဖြင့် ခံယူနိုင်ပါသည်။ သို့သော် စမ်းသပ်ခြင်း၊ ဆေးကုသစရိတ် တချို့တစ်ဝက်ကိုမူ ကာယကံရှင်မှ ကျခံရပါသည်။ ထို့အပြင် ကျန်းမာရေးစစ်ဆေးခြင်း အကျိုးခံစားခွင့်ကိုလည်း ရယူနိုင်ပါသည်။ ကျန်းမာရေးစစ်ဆေးခြင်းသည် အသက်အရွယ်အလိုက် ကွာခြားချက် ရှိသော်လည်း ပုံမှန်အားဖြင့် 2နှစ်လျှင် တစ်ကြိမ် စစ်ဆေးခြင်း ခံယူနိုင်ပါသည်။

နိုင်ငံခြားသားမှတ်ပုံတင်ထားသော သူများအနေနှင့် ကျန်းမာရေးအာမခံ သက်ရောက်မှုရှိသော လုပ်ငန်းခွင်တွင် အလုပ်လုပ်နေသောသူနှင့် အစိုးရဝန်ထမ်း၊ ပညာရေးဝန်ထမ်းအဖြစ် ခန့်အပ်ခြင်း သို့မဟုတ် ခန့်ထားသောသူသည် အလုပ်မှတစ်ဆင့် ကျန်းမာရေးအာမခံသွင်းနေသူများဖြစ်ပါသည်။ နိုင်ငံခြားသားမှတ်ပုံတင်ထားသောသူများအနေနှင့် အလုပ်မှတစ်ဆင့် ကျန်းမာရေးအာမခံသွင်းနေသူများမှအပ အမျိုးသားကျန်းမာရေးအာမခံဥပဒေပြဌာန်းချက် ပူးတွဲပါ 9အချက်တွင် အကျုံးဝင်သည့် နိုင်ငံခြားသားများသည် 6လနှင့်အထက် ကိုရီးယားနိုင်ငံတွင် နေထိုင်ပါက ဒေသခံစာရင်းသွင်းသူအဖြစ် သို့မဟုတ် အလုပ်မှတစ်ဆင့် ကျန်းမာရေးအာမခံသွင်းနေသူမှ မိမိ၏ မှီခိုသူအဖြစ် အကြောင်းကြားကာ စာရင်းထည့်သွင်းနိုင်ပါသည်။(ကိုရီးယားနိုင်ငံသားနှင့် လက်ထပ်ထားသူ၊ ပညာသင်၊ ရာသက်ပန်နေထိုင်ခွင့်ရသူ၊ E-9 ဗီဇာများသည် ကိုရီးယားနိုင်ငံသို့ ရောက်သည်နှင့် ချက်ချင်း သွင်းရပါမည်။)
သို့သော်၊ ပြည်ပဥပဒေ သို့မဟုတ် ပြည်ပအာမခံ သို့မဟုတ် အလုပ်ရှင်နှင့် ချုပ်ဆိုထားသည့် စာချုပ်အပေါ် မူတည်ပြီး ကျန်းမာရေးအာမခံနှင့် တူညီသော အခြားသော ဆေးဘက်ဆိုင်ရာအာမခံချက်များရှိပါက ကာယကံရှင်၏ လျှောက်ထားမှုပေါ် မူတည်၍ ကျန်းမာရေးအာမခံ သွင်းရမည့် တာဝန်အား ကင်းလွတ်ခွင့်ရနိုင်ပါသည်။

အိမ်ထောင်ဖက်၏ ကျန်းမာရေးအာမခံတွင် မှီခိုသူ*အဖြစ် စာရင်းထည့်သွင်းနိုင်ပြီး၊ မှီခိုသူအဖြစ် စစ်ဆေးအတည်ပြုရန် လိုအပ်သည့် စာရွက်စာတမ်းများကို အမျိုးသားကျန်းမာရေးအာမခံဌာနသို့ တင်ပြပေးရမည် ဖြစ်ပါသည်။

ကျန်းမာရေးအာမခံအတွက် အာမခံကြေး၊ အာမခံဝင်ခွင့်ဆိုင်ရာ၊ အကျိုးခံစားခွင့် စသည့် အသေးစိတ် အချက်အလက်များကို အမျိုးသားကျန်းမာရေးအာမခံဌာန ဟုမ်းပေ့ချ်ကို အသုံးပြုခြင်း သို့မဟုတ် ဖုန်းနံပါတ်(☎1577-1000) သို့မဟုတ် နိုင်ငံခြားဘာသာစကား(အင်္ဂလိပ်၊ တရုတ်၊ ဗီယက်နမ်၊ ဥဇဘတ်)ဖြင့် ဆွေးနွေးရန်ဖုန်း(☎033-811-2000)သို့ ဆက်သွယ် မေးမြန်းနိုင်ပါသည်။