ကိုရီးယားနိုင်ငံတွင်းနေထိုင်မှုလမ်းညွှန်

ကိုရီးယားနိုင်ငံ၏ မိသားစုနေထိုင်မှုသည် အခြားနိုင်ငံများနှင့် မတူကွဲပြားသော ကိုယ်ပိုင်ထူးခြားချက် ရှိပါသည်။ ကိုရီးယားမိသားစု၏ ထူးခြားချက်ကို နားလည်ပြီဆိုလျှင် မိသားစုနေထိုင်မှုတွင် ပိုပြီးအဆင်ပြေနိုင်ပြီး၊ ကိုရီးယားနိုင်ငံ၏ ယဉ်ကျေးမှုကို လေ့လာရာတွင် အထောက်အကူပြုမည် ဖြစ်ပါသည်။ မိသားစုယဉ်ကျေးမှုသည် တစ်အိမ်နှင့် တစ်အိမ် ကွာခြားချက်များ ရှိပြီး၊ ဒေသအလိုက် ကွာခြားချက်များလည်း ရှိပါသည်။ ကိုရီးယားနိုင်ငံသည် ဟိုးယခင်ကတည်းက ကွန်ဖြူးရှပ်ဝါဒ ယဉ်ကျေးမှု၏ လွှမ်းမိုးမှုခံခဲ့ရသည်။ ထို့ကြောင့် ကိုရီးယား မိသားစုယဉ်ကျေးမှုသည် ကွန်ဖြူးရှပ်ဝါဒ ယဉ်ကျေးမှုနိုင်ငံများနှင့် တူညီသော အချက်များ ရှိသော်လည်း မြန်ဆန်သော စက်မှုဖွံ့ဖြိုးတိုးတက်မှုကြောင့် ကိုရီးယားနိုင်ငံ၏ မိသားစုယဉ်ကျေးမှုသည်လည်း တဖြည်းဖြည်း ပြောင်းလဲလာခဲ့ပါသည်။

လက်ထပ်ခြင်းအားဖြင့် မိသားစုကြားဆက်ဆံရေး၊ နေထိုင်မှုဘဝပုံစံ၊ အတွေးအခေါ်ပုံစံများ မတူသည့်သူ နှစ်ဦး ပေါင်းစပ်ပြီး မိသားစုတစ်ခု ဖြစ်လာခြင်း ဖြစ်သည်။ ထို့အတွက် မိသားစုနေထိုင်မှုဘဝနှင့် ပတ်သက်ပြီး အယူအဆများ ခြားနားမှုကို ညှိနှိုင်းခြင်းသည် အိမ်ထောင်ကျစတွင် အင်မတန် အရေးကြီးပါသည်။ ယဉ်ကျေးမှုနောက်ခံ မတူသောသူ နှစ်ဦး တွေ့ဆုံပြီး လက်ထပ်ထားသော အိမ်ထောင်ရေးဖြစ်ပါက မိသားစုနေထိုင်မှုဘဝနှင့် ပတ်သက်ပြီး အယူအဆ ကွဲလွဲမှုသည် ပိုမိုကြီးမားနိုင်သည်ကို သတိပြုရပါမည်။ အိမ်ထောင်ဖက်နှင့် အတွေးအခေါ် မတူသည့်အတွက် မိသားစုနေထိုင်မှုဘဝတွင် အခက်အခဲရှိပါက အောက်ပါ နည်းလမ်းများကို အကြံပြုပါသည်။

ကိုရီးယားနိုင်ငံတွင် လူတစ်ဦးတည်းကိုပင်လျှင် အခြေအနေပေါ် မူတည်ပြီး အမျိုးမျိုး ခေါ်ဝေါ်ပြီး စကားပြောကြပါသည်။ ကိုရီးယားစကားစစ်စစ် အမည်အခေါ်အဝေါ်နှင့် တရုတ်စကား(ဟန်ကျာ)ကို ရောပြီး သုံးကြပါသည်။ ထို့ကြောင့် ကြားနာသူအခေါ်အဝေါ်နှင့် အပြောခံသူအခေါ်ဝေါ်များကို မှားယွင်းပြီး သုံးမိပါက ယဉ်ကျေးမှုမရှိဟု ယူဆခံရနိုင်သည့်အတွက် သတိထားရပါမည်။ ‘ကြားနာသူအခေါ်အဝေါ်’ဆိုသည်မှာ တစ်စုံတစ်ယောက်အား တိုက်ရိုက်ခေါ်သည့် စကားဖြစ်ပြီး၊ ‘အပြောခံသူအခေါ်ဝေါ်’ဆိုသည်မှာ တစ်စုံတစ်ယောက်အကြောင်းကို တခြားသူထံ ပြောပြစဉ် ရည်ညွှန်းသော စကားဖြစ်ပြီး ဤနှစ်မျိုးကို ပေါင်းပြီး ‘အမည်အခေါ်အဝေါ်'ဟု ခေါ်ပါသည်။

ကိုရီးယားစကားသည် တစ်ဖက်သူ၏ အသက်အရွယ်၊ ရင်းနှီးမှု၊ ရာထူးနေရာ စသည်တို့အလိုက် အသုံးပြုပုံ မတူပါ။ တစ်ဖက်သူကို ယဉ်ကျေးစွာ ပြောသော(အမြင့်စကား)နှင့် မြှင့်ပြောခြင်း၊ နှိမ့်ပြောခြင်း စကား မဟုတ်သော ရိုးရိုးသုံးစကား ရှိပါသည်။

မိသားစုနေထိုင်မှုဘဝတွင် ကလေးမွေးဖွားခြင်း၊ အိမ်ထောင်ပြုခြင်း၊ ကွယ်လွန်ခြင်း စသည့် များပြားလှသော ကိစ္စရပ်များ ဖြစ်ပေါ်လေ့ရှိပါသည်။ ၎င်းတို့သည် မိမိနှင့် မိသားစုအတွက် အရေးကြီးသော နေ့များဖြစ်သည့်အတွက် ၎င်းတို့ကို စိတ်ပျော်ရွှင်စွာဖြင့် ဂုဏ်ပြုပေးခြင်း၊ စိတ်ဝမ်းနည်းစွာဖြင့် အတူတူ ရှိနေပေးခြင်းသည် လူ့ယဉ်ကျေးမှုဖြစ်သည်။

ရိုးရာဓလေ့ပုံစံနှင့် အနောက်တိုင်းပုံစံ မင်္ဂလာပွဲများ ရှိပြီး၊ ရိုးရာဓလေ့ပုံစံမင်္ဂလာပွဲမှာ ယနေ့ခေတ်တွင် မရှိသလောက် ရှားသွားပြီဖြစ်ပြီး၊ များသောအားဖြင့် အနောက်တိုင်းပုံစံဖြင့် ကျင်းပကြပါသည်။ အနောက်တိုင်းပုံစံ မင်္ဂလာပွဲများကို ဟိုတယ်၊ ခရစ်ယာန်ဘုရားကျောင်း၊ ဘုန်းကြီးကျောင်း စသည်တို့၌ ကျင်းပနိုင်ပါသည်။ သတို့သားသည် tuxedo မင်္ဂလာဝတ်စုံ၊ သတို့သမီးသည် ဂါဝန်ဝတ်ပြီး မင်္ဂလာပွဲ ကျင်းပကြပါသည်။ အနောက်တိုင်းပုံစံဖြင့် မင်္ဂလာပွဲ ကျင်းပကြသော်လည်း သတို့သားနှင့် သတို့သမီးမှ မိဘ၊ ဆွေမျိုးများအား တရားဝင် နှုတ်ဆက်ကန်တော့သည့်အခါ ရိုးရာဓလေ့ပုံစံမင်္ဂလာပွဲကဲ့သို့ ပြုလုပ်ခြင်းမျိုးလည်း ရှိပါသည်။ ထိုသို့ နှုတ်ဆက်ကန်တော့ခြင်းကို ‘နှစ်ဖက်လူကြီးမိဘများအား နှုတ်ဆက်ကန်တော့ခြင်း’ ဟု ခေါ်ပါသည်။

လူတစ်ယောက် ကွယ်လွန်သွားသည့်အခါ ကွယ်လွန်သူအပေါ် ထားရှိသော ယဉ်ကျေးမှုကို ဆိုလိုပါသည်။ ကွယ်လွန်သူ၏ မိသားစုများသည် အသုဘဝတ်စုံကို ဝတ်ပြီး၊ ကွယ်လွန်သူကိုမူ ဆူအွီး(ချည်ကြမ်းရိုးရာဝတ်စုံ) ဝတ်ပေးကြပါသည်။ ပုံမှန်အားဖြင့် အသက်ကြီးရင့်သူများသည် ဆူအွီးကို သက်ရှိထင်ရှား ရှိစဉ်ကတည်းက ပြင်ဆင်ထားကြပါသည်။ အသုဘဝတ်စုံသည် မျိုးရိုးမိသားစု သို့မဟုတ် ဒေသအလိုက် ကွာခြားချက်ရှိပါသည်။ လျှော်သားဝတ်စုံကို ဝတ်ဆင်ခြင်းများလည်း ရှိပြီး၊ များသောအားဖြင့် အဖြူရောင်၊ အနက်ရောင် ဝတ်စုံကို ဝတ်လေ့ရှိကြပါသည်။ အသုဘသတင်းမေး လာရောက်ကြသော ဧည့်သည်များအနေဖြင့် အရောင် အရမ်းတောက်သော အဝတ်အစားများကို ရှောင်ပြီး အနက်ရောင် သို့မဟုတ် အဖြူရောင် အဝတ်အစားများကို ဝတ်ဆင်ခြင်းက ပိုမိုသင့်တော်ပါသည်။ အသုဘအခမ်းအနားသို့ လာသည့်အခါ ကွယ်လွန်သူ၏ မိသားစုမှ ပြင်ဆင်ထားသော နည်းလမ်းအတိုင်း ကန်တော့ခြင်းဖြင့် ဝမ်းနည်းမှုကို ဖော်ပြကြပါသည်။ မိမိ တတ်နိုင်သလောက် ‘အကူငွေ(ငွေသား)’လည်း ထည့်ဝင်ကြပါသည်။

ကွယ်လွန်သွားသော မိဘကို အမှတ်ရကန်တော့သော ဓလေ့သည် ကွယ်လွန်သောနေ့ သို့မဟုတ် မတိုင်ခင်နေ့ ည၌ ကျင်းပပြီး၊ ကျင်းပပုံ အမျိုးမျိုးရှိပါသည်။ ပါဝင်ကန်တော့သူများသည် အဝတ်အစားကို သေသေသပ်သပ် ဝတ်ပြီး သွားလေသူအား အမှတ်ရသော စိတ်ဖြင့် ကန်တော့ကြပါသည်။ အိမ်တွင်းရိုးရာယဉ်ကျေးမှုအရ မိမိတို့၏ ဘာသာရေး ဓလေ့ထုံးတမ်းအရ ကွာခြားချက်ချက်များ ရှိနိုင်ပါသည်။