ကိုရီးယားနိုင်ငံတွင်းနေထိုင်မှုလမ်းညွှန်

ကိုယ်ဝန်ဆောင်မိခင်၏ ကျန်းမာရေးစောင့်ရှောက်မှုအတွက် ဆောင်ရွက်ပေးနေသော အထွေထွေ စစ်ဆေးမှုအမျိုးအစားများမှာ အောက်ပါအတိုင်း ဖြစ်ပါသည်။ ၎င်းအပြင် ကိုယ်ဝန်ဆောင်မိခင်နှင့် သန္ဓေသား ကျန်းမာရေးအခြေအနေပေါ် မူတည်၍ တစ်ဆင့်ပိုပြီး အသေးစိတ် စစ်ဆေးမှုများကို လုပ်နိုင်ပါသည်။

ကိုယ်ဝန်ဆောင်မိခင်(ကိုရီးယားလူမျိုးနှင့် လက်ထပ်ထားသော ရွှေ့ပြောင်းနေထိုင်သူ အပါအဝင်)များသည် ဒေသန္တရကျန်းမာရေးဌာနတွင် ကျန်းမာရေးစောင့်ရှောက်မှုများ ခံယူနိုင်ပါသည်။
အထူးသဖြင့် အန္တရာယ်ဖြစ်နိုင်ချေများသော ကိုယ်ဝန်ဆောင်မိခင်*သည် မဖြစ်မနေ ဒေသန္တရကျန်းမာရေးဌာန သို့မဟုတ် ဆေးရုံဆေးခန်းများ၏ စောင့်ရှောက်မှုများ လိုအပ်ပါသည်။

ကိုယ်ဝန်ဆောင်မိခင်သည် ဒေသန္တရကျန်းမာရေးဌာနတွင် ကိုယ်ဝန်စစ်ဆေးခြင်း၊ ဆီးစစ်ခြင်း(ဆီးချိုသွေးချို၊ ပရိုတင်းဓာတ်စစ်ခြင်း)၊ သွေးစစ်ခြင်း(ဟေမိုဂလိုဘင်၊ သွေးနီဥ၊ သွေးဖြူဥ၊ သွေးရည်ကြည်ဆစ်ဖလစ်၊ အသည်းရောင်ရောဂါ၊ သွေးအမျိုးအစား စစ်ခြင်း)များ လုပ်နိုင်ပါသည်။ ကိုယ်ဝန် အစောပိုင်းကာလ စစ်ဆေးမှုများကို ဒေသန္တရကျန်းမာရေးဌာနတွင် စာရင်းသွင်းရုံဖြင့် စောင့်ရှောက်မှုများ ရနိုင်ပါသည်။(ဒေသန္တရကျန်းမာရေးဌာနအလိုက် စစ်ဆေးနိုင်သည့် အကြောင်းအရာစာရင်းမှာ ကွာခြားနိုင်ပါသည်။)

ဒေသန္တရကျန်းမာရေးဌာနတွင် စာရင်းသွင်းထားသော ကိုယ်ဝန် 16ပတ်နှင့်အထက် ကိုယ်ဝန်ဆောင်မိခင်အတွက် သံဓာတ်အားဆေး 5လစာ ထုတ်ပေးပါသည်။

ဒေသန္တရကျန်းမာရေးဌာနတွင် စာရင်းသွင်းထားသည့် ကိုယ်ဝန်ဆောင်မိခင် သို့မဟုတ် ကလေးယူရန် ပြင်ဆင်နေသော အမျိုးသမီးများအား ကိုယ်ဝန်မရခင် 3လ၊ ကိုယ်ဝန်ရပြီး 3လစာ ဖောလစ်အက်စစ်များ ထုတ်ပေးပါသည်။

အန္တရာယ်များသော ကိုယ်ဝန်ဆောင်ရောဂါ 19မျိုးဖြင့် ဆေးရုံတက်ပြီး ဆေးကုသမှု ခံယူခဲ့သော ကိုယ်ဝန်ဆောင်မိခင်အတွက် ကျန်းမာရေးအာမခံတွင် အကျုံးမဝင်သော ဆေးကုသစရိတ်ကို ဝမ် သိန်း 30 သတ်မှတ်ပမာဏအတွင်းမှ ထောက်ပံ့ပေးသော လုပ်ငန်းဖြစ်ပါသည်။

အာဟာရပိုင်း ပြဿနာရှိနေသော ကိုယ်ဝန်ဆောင်မိခင်နှင့် နို့စို့ကလေး၊ ကလေးငယ်များအတွက် အာဟာရဆိုင်ရာ ပညာပေးခြင်းနှင့် ဆွေးနွေးမှုများ လုပ်ပေးပြီး၊ ဖြည့်စွက်စားသောက်ကုန် packageများပေးကာ ၎င်းတို့၏ အာဟာရပိုင်း ပြဿနာရှိမှုကို ပြန်လည်ကောင်းမွန်လာစေရေး၊ ကိုယ်တိုင် စားသောက်မှုပုံစံ ထိန်းသိမ်းနိုင်စွမ်း မြှင့်တင်ပေးရန်အတွက် ကျန်းမာရေးနှင့် လူမှုဖူလုံရေးဝန်ကြီးဌာနမှ ဆောင်ရွက်ပေးလျက်ရှိသော အစီအစဥ်ဖြစ်ပါသည်။

ကိုယ်ဝန်ဆောင်မိခင်များအား တုပ်ကွေးကာကွယ်ဆေး ထိုးပေးခြင်းများ လုပ်ပေးပြီး ကိုယ်ဝန်ဆောင်မိခင်နှင့် သန္ဓေသား တုပ်ကွေး ကူးစက်မှုအား ကာကွယ်နိုင်ရန် ဆောင်ရွက်လျက် ရှိသော လုပ်ငန်းဖြစ်ပါသည်။

မီးဖွားသည့်အခါ သားဖွားမီးယပ်ဌာနကို အသုံးပြုပါ။ ဒေသန္တရကျန်းမာရေးဌာနတွင် မီးမဖွားမီ စောင့်ရှောက်မှုများ ခံယူခဲ့သော ကိုယ်ဝန်ဆောင်မိခင်ဖြစ်သော်လည်း မီးဖွားခြင်းကိုမူ ရိုးရိုး ဆေးရုံ၊ ဆေးခန်းများတွင် လုပ်ရပါမည်။ မီးမဖွားမီ ပြင်ဆင်စရာများကို တစ်ခုချင်း သေသေချာချာ ပြင်ဆင်ထားမှသာ မီးဖွားသည့်အခါ စိတ်အေးလက်အေးဖြင့် ဖွားမြင်နိုင်မည်ဖြစ်ပါသည်။ ကလေးမွေးဖွားနည်းများ အမျိုးမျိုး ရှိသော်လည်း အဓိကအားဖြင့် ရိုးရိုးမွေးခြင်းနှင့် ဗိုက်ခွဲမွေးခြင်းတို့ ရှိပါသည်။

မွေးဖွားလာသော ကလေးအတွက် ဝမ် သိန်း 20အား ကြိုဆိုဂုဏ်ပြုငွေအဖြစ် ပေးပြီး မွေးကင်းစကလေး ပြုစုပျိုးထောင်ခြင်းအတွက် ကုန်ကျစရိတ်ပိုင်း ဝန်ထုပ်ဝန်ပိုးကို လျှော့ပေးရန်အတွက် ဖြစ်ပါသည်။