Information Plus
ဒါနူရီကောလ်စင်တာ
1577-1366
မိသားစုဆွေးနွေးမှုဖုန်းနံပါတ်
1644-6621
한국생활안내 정보더하기 사이트로 이동
  • ကိုရီးယားကျန်းမာပျော်ရွှင်မိသားစုကမ္ဘာပရိုမိုးရှင်းစင်တာ

ဒါနူရီကောလ်စင်တာ : 1577-1366

가족상담전화 : 1644-6621

ဆိုးလ် ဂျွန်းဂူ ထွယ်ဂရဲရို 173၊ 21လွှာ၊ 24လွှာ(ချွန်းမူရို 3ဂါ၊ NAMSAN SQUARE building)

Copyright ⓒ KOREA INSTITUTE FOR HEALTHY FAMILY. All Rights Reserved

이전 페이지로

စားသုံးသူစီးပွားရေးဘဝ

  • ပင်မစာမျက်နှာ
  • ကိုရီးယားယဉ်ကျေးမှုနှင့် လူနေမှုဘဝ
  • စားသုံးသူစီးပွားရေးဘဝ

စားသုံးသူစီးပွားရေးဘဝ

01ငွေစာရင်း

(1)ငွေစာရင်း

ငွေစာရင်းဆိုသည်မှာ အိမ်တစ်အိမ်၏ ဝင်ငွေနှင့် ထွက်ငွေ အခြေအနေကို ဆိုလိုပါသည်။ ဝင်ငွေနည်းသော်လည်း ဘယ်လို စီမံခန့်ခွဲသလဲဆိုသည့်အပေါ် မူတည်ပြီး ငွေစာရင်းက အပေါင်း(+)လည်း ပြနိုင်သကဲ့သို့ အနှုတ်(-)လည်း ပြနိုင်ပါသည်။

(2)ငွေကြေးတန်ဖိုး

ကိုရီးယား၏ ငွေကြေးများမှာ အကြွေစေ့(ဝမ် 10၊ ဝမ် 50၊ ဝမ် 100၊ ဝမ် 500)များ ရှိပြီး၊ ငွေစက္ကူအနေနှင့် ဝမ် 1,000၊ ဝမ် 5,000၊ ဝမ်10,000၊ ဝမ် 50,000တန်များ ရှိပါသည်။ ထို့အပြင် ဝမ် 100,000အထက် အမျိုးမျိုးသော ငွေတန်ဖိုးရှိသည့် ချက်လက်မှတ်များကိုလည်း အသုံးပြုနိုင်ပါသည်။

  • အကြွေစေ့
  • 10원
    < 10ဝမ် >
  • 50원
    < 50ဝမ် >
  • 100원
    < 100ဝမ် >
  • 500원
    < 500ဝမ် >
  • ငွေစက္ကူ
  • 1,000원
    < 1,000ဝမ် >
  • 5,000원
    < 5,000ဝမ် >
  • 10,000원
    < 10,000ဝမ် >
  • 50,000원
    < 50,000ဝမ် >
  • 100,000원권 수표
    < 100,000တန် ချက်လက်မှတ် >
  • ဝမ် 100,000တန် ဘဏ်ထုတ်ချက်လက်မှတ်ကို ငွေသားအလား ကျယ်ပြန့်စွာ အသုံးပြုကြပါသည်။(ချက်လက်မှတ်ကို အသုံးပြုမည်ဆိုလျှင် မှတ်ပုံတင်ပြပြီး ချက်လက်မှတ် နောက်တွင် အမည်နှင့် ဖုန်းနံပါတ် စသည်ကို ရေးသားရပါသည်။)

ကိုရီးယားနိုင်ငံ ငွေကြေးဖြစ်သည့် ဝမ် 1,000၊ ဝမ် 5,000၊ ဝမ် 10,000၊ ဝမ် 50,000ဖြင့် ဝယ်၍ရနိုင်သည်များ၊ မိခင်နိုင်ငံ ငွေကြေး တန်ဖိုးနှင့် ယှဉ်ကြည့်ပြီး ကိုရီးယားနိုင်ငံ၏ ကုန်စျေးနှုန်းများ စသည်တို့ကို အမြဲ ထည့်သွင်းစဉ်းစားရပါမည်။

သိရှိထားရန်!
ဒီ ပိုက်ဆံနှင့် ဘာလုပ်လို့ ရမလဲ။
  • 아이스크림

    မုန့် တစ်ထုပ် သို့မဟုတ် ရေခဲမုန့် တစ်ခု ဝမ် 1,000~2,000

  • 자판기 커피

    အမေရီကာနို ကော်ဖီတစ်ခွက်၊ ဝမ် 2,000 နှင့် 4,000 ကြား

  • 냉면

    အခြေခံ ထမင်း တစ်နပ်၊ ခေါက်ဆွဲအေး စသည့် အစားအစာ ဝမ် 8,000~10,000

  • 돼지고기

    ဝက်သား 500g ဝမ် 10,000

  • 쌀포대

    ဆန် တစ်အိတ်(20kg) ဝမ် 55,000

  • နေရာဒေသ သို့မဟုတ် ပစ္စည်းအမျိုးအစားအပေါ် မူတည်ပြီး အထက်ပါ စျေးနှုန်းများနှင့် ကွာခြားမှု ရှိနိုင်ပါသည်။

02ပစ္စည်းဝယ်ယူခြင်းနှင့် အသုံးပြုခြင်း

အစီအစဉ် မရှိဘဲ ရှော့ပင်းလုပ်မိလျှင် မလိုအပ်သော ပစ္စည်းများအထိပါ ဝယ်မိတတ်ပြီး၊ ဝင်ငွေထက် ထွက်ငွေ များလာပြီး၊ ငွေစာရင်း စီမံမှုတွင် အခက်အခဲများ ပေါ်လာတတ်သည့်အတွက် ရှော့ပင်း မလုပ်မီ သေချာစွာ အစီအစဉ် ရေးဆွဲသင့်ပါသည်။

(1)စာရင်းရေးခြင်း

ပစ္စည်းများ မဝယ်မီ ဝယ်မည့်အရာများကို ကြိုပြီး ရေးကြည့်ပါ။

(2)ပစ္စည်းဝယ်မည့် နေရာ

ဘယ်နေရာတွင် မည်မျှ ဝယ်မယ်ကို သတ်မှတ်ပါ။

24နာရီဆိုင်

24နာရီလုံးလုံး ဖွင့်သော ဆိုင်ဖြစ်သည့်အလျောက် အစားအသောက်မှ စပြီး အမျိုးစုံသော ပစ္စည်းများ ရနိုင်ပါသည်။ ဆိုင်က သေးသည့်အတွက် လိုချင်သော ပစ္စည်းများကို ရှာရ လွယ်ကူသောကြောင့် ပစ္စည်း တစ်မျိုး၊ နှစ်မျိုးလောက် အမြန် ဝယ်ယူရန် လိုအပ်သည့်အချိန်တွင် အဆင်ပြေပါသည်။

ရိုးရိုးစျေး(5ရက်စျေး)

စားသောက်ကုန်၊ အဝတ်အထည်၊ လူသုံးကုန်(နေ့စဉ်သုံးပစ္စည်းများ) စသဖြင့် အမျိုးမျိုးသော ပစ္စည်းများ စုံလင်လှသော ရိုးရိုးစျေးသည် စျေးနှုန်းသက်သာပြီး၊ စျေးဆစ်ခြင်းနှင့် အပိုတောင်းခြင်းများ လုပ်နိုင်ပါသည်။ ထို့ပြင် ၎င်းစျေးများတွင် သာမန်ကိုရီးယား ပြည်သူများ၏ လူနေမှုပုံစံကို စိတ်ဝင်စားစွာ လေ့လာတွေ့မြင်နိုင်ပါသည်။

ရပ်ကွက် စူပါမားကတ်

အဓိကအားဖြင့် မုန့်၊ ဟင်းသီးဟင်းရွက်များ၊ အသားများ၊ အချိုရည်များ စသည့် စားသောက်ကုန်များကို အဓိကထား ရောင်းချပြီး အိမ်အနီးနား(ရပ်ကွက်ထဲ)တွင် ရှိသည့်အတွက် နီးပြီး အဆင်ပြေစွာ အသုံးပြုနိုင်ပါသည်။

ကုန်တိုက်

အဝတ်အထည်၊ စားသောက်ကုန်၊ အိမ်သုံးလျှပ်စစ်ပစ္စည်း၊ လက်ဝတ်ရတနာ စသဖြင့် ပစ္စည်းများ၏ အမျိုးအရေအတွက်မှာ အလွန် များပြီး၊ အဆောက်အဦနှင့် ဝန်ဆောင်မှု ကောင်း၍ ပစ္စည်းအရည်အသွေးလည်း သာလွန်ကောင်းမွန်သည့်အတွက် စျေးနှုန်းမှာလည်း မြင့်ပါသည်။ လျှော့စျေးချပွဲများ မကြာမကြာ ရှိသည့်အတွက် စျေးချသည့်အချိန်ထိ စောင့်ပြီး ဝယ်ယူခြင်းသည် မိမိအတွက် အကျိုးရှိပါသည်။

အကြီးစား martများ

ကုန်တိုက်နည်းတူ အဝတ်အထည်၊ စားသောက်ကုန်၊ အိမ်သုံးလျှပ်စစ်ပစ္စည်း၊ လူသုံးကုန် စသည့် အမျိုးစုံသော ပစ္စည်းများ ရှိပါသည်။ ပစ္စည်း၏ အရည်အသွေးလည်း ကောင်းမွန်သည်ဟု ဆိုနိုင်ပြီး အဆောက်အဦနှင့် ဝန်ဆောင်မှုလည်း ကောင်းမွန်သည်ဟု ဆိုနိုင်ပါသည်။

TV ဟုမ်းရှေ့ာပင်း

တီဗွီထဲမှ ပစ္စည်းကြော်ငြာများကို ကြည့်ကာ ဖုန်း၊ အင်တာနက်ဖြင့် ချက်ချင်း မှာယူနိုင်ပြီး အဝတ်အထည်၊ စားသောက်ကုန်၊ အလှကုန်၊ အိမ်သုံးလျှပ်စစ်ပစ္စည်း၊ အာမခံ စသဖြင့် အမျိုးစုံသော ပစ္စည်းများကို ရောင်းချပေးပါသည်။ အဆင်ပြေ သက်တောင့်သက်သာရှိသော်လည်း မလိုအပ်သော ပစ္စည်းများကို အလောတကြီး ဝယ်မိတတ်သည့်အတွက် သတိထားရပါမည်။

အင်တာနက် ရှော့ပင်းမောလ်

အင်တာနက်ကို အသုံးပြုပြီး ပစ္စည်းများ မှာယူနိုင်ပြီး၊ ရောင်းချသည့်ပစ္စည်း အမျိုးအစားများမှာ အရမ်း များပါသည်။ သို့သော် ရံဖန်ရံခါ ကွန်ပျူတာ စခရင်ပေါ်တွင် မြင်ရသည့် အရောင် သို့မဟုတ် အရွယ်အစား စသည်တို့သည် အပြင်က ပစ္စည်းနှင့် ကွဲပြားမှုများ ရှိနိုင်သည့်အတွက် သေချာကြည့်၍သော်လည်းကောင်း၊ ရောင်းချသူထံ မေးကြည့်ပြီး ဝယ်ယူခြင်းသည် ပိုကောင်းပါသည်။

(3)ငွေပေးချေနည်း

ငွေပေးချေနည်းအနေဖြင့် ငွေသား၊ ချက်လက်မှတ်၊ အကြွေးဝယ်ကတ်၊ ငွေသားကတ်၊ စျေးဝယ်လက်မှတ် စသဖြင့် ရှိပါသည်။

  • 신용카드
    < အကြွေးဝယ်ကတ် >
  • 상품권
    < စျေးဝယ်လက်မှတ် >

(4)ပစ္စည်းဝယ်ယူခြင်း

ပစ္စည်း တစ်ခုနှင့်တစ်ခု စျေးနှုန်းနှင့် အရည်အသွေးများကို နှိုင်းယှဉ်ပြီး၊ စားသောက်ကုန်များဖြစ်ပါက သက်တမ်းကုန်ဆုံးရက်ကိုလည်း စစ်ဆေးပါ။ ပစ္စည်းဖိုး တိကျစွာ တွက်ချက်ထားခြင်းရှိမရှိကို စစ်ဆေးရန် လိုအပ်ပါသည်။ ဝယ်ယူပြီးနောက် ပြေစာကို မဖြစ်မနေ ယူထားရမည်ဖြစ်ပြီး၊ ပစ္စည်း ပြန်လဲခြင်း၊ ငွေပြန်အမ်းခိုင်းသည့်အခါတွင် ပြေစာ လိုအပ်ပါသည်။

(5)ပစ္စည်းများ အသုံးမပြုမီ

  • အရည်အသွေး အာမခံစာရွက် သိမ်းထားရန် : တစ်နေရာတည်းတွင် စုထားပြီး သတ်မှတ်နေရာ၌ သိမ်းထားပါ။
  • အသုံးပြုသူ မန်နူရယ် ဖတ်ရန် : ပစ္စည်းကို မှန်ကန်စွာ အသုံးပြုနိုင်မည် ဖြစ်ပါသည်။
  • သတိထားရမည့်အချက်နှင့် သိမ်းဆည်းနည်း စစ်ဆေးရန် : ခန္ဓာကိုယ် ဘေးကင်းရေးနှင့် ကျန်းမာရေးအတွက် သတိထားရမည့်အချက်နှင့် သိမ်းဆည်းနည်းကို မဖြစ်မနေ စစ်ဆေးပါ။
  • 품질보관서와 사용설명서
    < အရည်အသွေး အာမခံစာရွက် နှင့် အသုံးပြုသူမန်နူရယ် >

(6)ပစ္စည်းပြန်ပို့ပြီး ငွေပြန်အမ်းခိုင်းခြင်း ပြုလုပ်သည့်အခါ သတိထားရမည့် အချက်များ

  • ပစ္စည်းကို အသုံးမပြုဘဲ၊ မပျက်ယွင်းစေဘဲ သေချာ သိမ်းဆည်းပါ။
  • 7~14ရက်အတွင်း ပစ္စည်းပြန်ပို့ပြီး ငွေပြန်အမ်းခိုင်းရမည် ဖြစ်သည့်အတွက် အလျင်အမြန် မိသားစု သို့မဟုတ် အိမ်နီးချင်းများထံ ပြောပြီး အကူအညီ တောင်းခံပါ။
  • ပစ္စည်းပြန်ပို့၍ ငွေပြန်အမ်းခိုင်းရန် ခက်ခဲခြင်း သို့မဟုတ် အခြားသော ဆုံးရှုံးနစ်နာမှု ကြုံရသည့်အခါမျိုးတွင် ကိုရီးယားနိုင်ငံ စားသုံးသူအေဂျင်စီနှင့် စားသုံးသူအဖွဲ့အစည်း စသည်တို့ထံ အကူအညီ တောင်းခံပါ။
ကိုရီးယားနိုင်ငံစားသုံးသူအေဂျင်စီ : ☎ 1372, www.kca.go.kr
စားသုံးသူပြည်သူများအဖွဲ့ : ☎ 02-739-5441, www.consumerskorea.org

03ငွေစုခြင်းနှင့် ဘဏ် အသုံးပြုခြင်း

(1)ငွေစုခြင်း၏ လိုအပ်မှု

ဥစ္စာ စုဆောင်းခြင်း၊ မမျှော်လင့်ထားသော ဘေးအန္တရာယ်အတွက် ကြိုတင်ပြင်ဆင်ခြင်း၊ နောင်ရေးအတွက် ပြင်ဆင်ခြင်း၊ အိမ်ဝယ်ရန်၊ သားသမီး ကျောင်းအပ်ခ စသဖြင့် ငွေအလုံးအရင်း ပြင်ဆင်ရန်အတွက် ငွေစုခြင်းကို လုပ်ရပါမည်။ ငွေစုရန်အတွက် ဘဏ်တွင် အကောင့် ဖွင့်ထားသင့်ပါသည်။

(2)ငွေစုခြင်း ပုံစံများ

  • ငွေစုဘဏ်အပ်ငွေစာရင်း: အချိန်မရွေး လွတ်လပ်စွာ ပိုက်ဆံ အပ်ထားပြီး ပြန်ထုတ်သုံးနိုင်သော အပ်ငွေဖြစ်ကာ အတိုးနှုန်း နိမ့်ပါသည်။
  • စာရင်းသေအပ်ငွေ : ငွေအလုံးအရင်းကို အချိန်ကြာမြင့်စွာ ပြန်မထုတ်ဘဲ ဘဏ်တွင် အပ်နှံထားသော အပ်ငွေဖြစ်ကာ အတိုးနှုန်း မြင့်ပါသည်။
  • စာရင်းသေစုငွေ : လစဉ် တူညီသော ငွေ ပမာဏ တစ်ခုကို သတ်မှတ်ကာလ ပြီးဆုံးသည်အထိ စုပြီးနောက် ငွေအလုံးအရင်းဖြင့် ပြန်ထုတ်ရသော စုငွေဖြစ်ကာ အတိုးနှုန်းမြင့်ပါသည်။
  • စာရင်းရှင်စုငွေစာရင်း : မိသားစု ငွေစုခြင်းအတွက် ငွေစုစာရင်း အသစ်၊ ရေရှည် အပ်နှံပါက အတိုးနှုန်းမြင့်ပါသည်။

(3)ဘဏ်အသုံးပြုခြင်း

ဘဏ်အကောင့် ဖွင့်နည်း(ဘဏ်စာအုပ် ပြုလုပ်နည်း)
  • ပြင်ဆင်ရန် : မှတ်ပုံတင်(ပတ်စ်ပို့၊ နိုင်ငံခြားသားမှတ်ပုံတင်၊ နိုင်ငံသားမှတ်ပုံတင် စသည်)၊ တံဆိပ်တုံး၊ စုမည့် ငွေ
  • လုပ်ဆောင်ပုံ အဆင့်ဆင့်
    1. 1တိုကင်နံပါတ် ထုတ်ယူပြီး မိမိ အလှည့်ကျသည်အထိ နေရာမှာ ထိုင်စောင့်ပါ။
    2. 2လျှပ်စစ် display ဘုတ်ပေါ်မှာ မိမိ နံပါတ် ပေါ်လာလျှင် ဖော်ပြပါ ကောင်တာသို့ သွားပါ။
    3. 3ဘဏ်ဝန်ထမ်းထံ အကြောင်းရင်း(ဘဏ်စာအုပ်ပြုလုပ်ရန်၊ ငွေလွှဲရန်၊ ငွေသွင်းရန် စသည်)ကို ပြောပါ(ငွေသားကတ် လိုအပ်ပါက တစ်ပါတည်း လျှောက်ထားပါ။)။
      • ငွေသားထုတ်ကတ် : ဘဏ်စာအုပ်နှင့် တံဆိပ်တုံး မလိုဘဲ ငွေသားအလိုအလျောက် ထုတ်သွင်းစက်(ATM)ကို အသုံးပြုပြီး ငွေသွင်းခြင်း၊ ငွေထုတ်ခြင်းများ လုပ်နိုင်သော ကတ်
    4. 4ဘဏ်ဝန်ထမ်း၏ လမ်းညွှန်မှုအတိုင်း စာရွက်စာတမ်းများ ဖြည့်စွက်ပြီး တင်ခဲ့ပါ။
    5. 5ဘဏ်စာအုပ် ရပြီဆိုလျှင် မှတ်ပုံတင်နှင့် တစ်ပါတည်း ယူပြီး ထွက်လာပါ။
      • လျှို့ဝှက်နံပါတ်ကိုမူ မိမိ တစ်ဦးတည်းပဲ သိထားရမည် ဖြစ်ပြီး လုံးဝ အခြားသူထံ ပြောပြ၍ မဖြစ်ပါ။
ဘဏ်အသုံးပြုချိန်
  • တနင်္လာနေ့~သောကြာနေ့ : 09:00~16:00
  • ရုံးချိန်ပြင်ပ : ဘဏ်တိုင်း 365ရက် ကော်နာ ငွေသားအလိုအလျောက်ထုတ်သွင်းစက်(ATM) သုံးပါ
ငွေသွင်းခြင်းနှင့် ငွေထုတ်ခြင်း၊ ငွေသားအလိုအလျောက် ထုတ်ခြင်း
  • ငွေသွင်းလျှောက်လွှာ သို့မဟုတ် ငွေထုတ်လျှောက်လွှာ ဖြည့်ပြီး ကောင်တာသို့ သွားနိုင်ပါသည်။ ငွေသွင်းခြင်းအတွက် လျှို့ဝှက်နံပါတ် မလိုအပ်ပေမဲ့ ငွေထုတ်ရာတွင်မူ လျှို့ဝှက်နံပါတ်၊ လက်မှတ်(တံဆိပ်တုံး) လိုအပ်ပါသည်။
  • ငွေသားအလိုအလျောက်ထုတ်သွင်းစက်(ATM)ဖြင့် ဘဏ်စာအုပ် သို့မဟုတ် ငွေသားထုတ်ကတ်ကို အသုံးပြုပြီး ငွေသွင်းခြင်း၊ ငွေထုတ်ခြင်းများ လုပ်နိုင်ပါသည်။ လျှို့ဝှက်နံပါတ် ထည့်ရမည် ဖြစ်ပြီး၊ 3ကြိမ် ဆက်တိုက် မှားပါက ငွေသွင်းခြင်း၊ ငွေထုတ်ခြင်း လုပ်၍ မရတော့ပါ။ ဘဏ်ရုံးချိန် ပြင်ပ အသုံးပြုခြင်း သို့မဟုတ် အခြားဘဏ်၏ ငွေသားအလိုအလျောက်ထုတ်သွင်းစက်(ATM) အသုံးပြုသည့်အခါ၌ ဝန်ဆောင်ခ ပေးရပါသည်။
  • 현금자동입출금기(ATM)
    < ငွေသားအလိုအလျောက်ထုတ်သွင်းစက်(ATM) >
အင်တာနက် ဘဏ်ကင်း
  • အင်တာနက် ဘဏ်ကင်းသည် အင်တာနက်ဖြင့် ဘဏ်လုပ်ငန်းများကို ဆောင်ရွက်ခြင်းကို ဆိုလိုပါသည်။
  • မိမိ ဘဏ်အကောင့်ထဲ လက်ကျန်ငွေ စစ်ဆေးခြင်း၊ ငွေသွင်းငွေထုတ်ခြင်း၊ ငွေလွှဲခြင်းများ အားလုံး လုပ်နိုင်ပါသည်။
  • KFTCမှ အွန်လိုင်းစနစ်ဖြင့် ထုတ်ပေးထားသော ဒီဂျစ်တယ်ဆာတီဖီကိတ်ကို PC စသည်တို့ထဲတွင် သိမ်းထားရမည် ဖြစ်ပြီး၊ ငွေလွှဲသည့်အခါ သုံးရန် ဘဏ်မှ ထုတ်ပေးထားသည့် လုံခြုံရေးကတ်(secret card)၊ OPT(one time password) ကတ်များ ရှိထားရပါမည်။ ဘဏ်ကို မေးမြန်းပြီး အကူအညီ ရယူနိုင်ပါသည်။
သိရှိထားရန်!
မိုဘိုင်းဘဏ်ကင်း

စမတ်ဖုန်းကဲ့သို့သော ရွေ့လျားဆက်သွယ်ရေးစက်များဖြင့် ဘဏ်လုပ်ငန်းများ ဆောင်ရွက်ခြင်း ဖြစ်ပါသည်။ သွားလာရင်းနှင့်ပင် အသုံးပြုနိုင်သည့်အတွက် အင်တာနက်ဘဏ်ကင်းကဲ့သို့ နေရာကန့်သတ်မှု မရှိသည့် အားသာချက် ရှိပါသည်။

အခွန်အခများ ပေးဆောင်ခြင်း
  • ကိုယ်တိုင် ပေးဆောင်ခြင်း
    တောင်းခံလွှာကို ယူပြီး ဘဏ်သို့ သွားကာ ကိုယ်တိုင် ပေးဆောင်နိုင်ပါသည်။ ယခုနောက်ပိုင်းတွင်မူ ဘဏ်ကောင်တာများ၌ အခွန်အခ ပေးဆောင်မှုဆိုင်ရာ ဝန်ဆောင်မှုများ မပေးတော့သည့် ဘဏ်က များပါသည်။ ၎င်းအခြေအနေမျိုးတွင် ဘဏ်အဆောက်အဦးထဲ၌ ထားရှိသည့် အလိုအလျောက်ပေးဆောင်စက်ကို အသုံးပြုနိုင်ပါသည်။ အလိုအလျောက်ပေးဆောင်စက် အသုံးပြုလိုပါက သက်ဆိုင်ရာ ဘဏ်၏ ဘဏ်စာအုပ် ရှိထားရမည် ဖြစ်ပါသည်။
    • ကိုးကားရန် : စာတိုက်တွင်လည်း အခွန်အခပေးဆောင်မှုများ လက်ခံဆောင်ရွက်ပေးသည့်အတွက် အကယ်၍ ဘဏ်စာအုပ် မရှိပါက စာတိုက်သို့ သွားပြီး ပေးဆောင်နိုင်ပါသည်။
  • အလိုအလျောက်ငွေလွှဲခြင်း
    လစဉ် သတ်မှတ် ရက်စွဲမှာ မိမိအမည်ပေါက် ဘဏ်အကောင့်ထဲမှ အခွန်အခများ အလိုအလျောက် ဖြတ်သွားအောင် လုပ်ထားသော နည်းလမ်းဖြစ်ပါသည်။ ဘဏ်သွားပြီး လျှောက်လျှင်လည်း ရပြီး အခွန်အခဆိုင်ရာ ဌာနများသို့ ဖုန်းဖြင့် လှမ်းပြီးလျှောက်လျှင်လည်း ရပါသည်။ အလိုအလျောက် ငွေလွှဲခြင်း လျှောက်ပြီးနောက်တွင် အခွန်အခ ဖြတ်တောက်မည့် ရက်ကို သေချာ မှတ်ထားပြီး လက်ကျန်ငွေ အလုံအလောက် ကျန်ရှိနေစေရန် ချန်ထားရမည် ဖြစ်ပါသည်။
ငွေလွှဲပြောင်းခြင်း
  • မိသားစုနာမည်ဖြင့် အမိနိုင်ငံမှာ ဘဏ်အကောင့်ကို ဖွင့်ပါ။
  • လက်ခံသူ အမည်၊ နေရပ်လိပ်စာ၊ ဖုန်းနံပါတ်၊ ဘဏ်နာမည်၊ ဘဏ်အကောင့်နံပါတ်၊ ငွေလွှဲသူ၏ မှတ်ပုံတင် ယူဆောင်ကာ ဘဏ်မှ နိုင်ငံခြားငွေကောင်တာသို့ သွားပါ။ ထို့နောက် ဘဏ်ဝန်ထမ်းမှ ကြည့်ပြီး အဆင်ပြေအောင် ဆောင်ရွက်ပေးပါလိမ့်မည်။
  • ငွေလွှဲပြီး ရရှိလာသည့် ပြေစာကို သေချာစွာ သိမ်းဆည်းထားပါ။
သိရှိထားရန်!
လုံခြုံစိတ်ချရဆုံးသော ငွေလွှဲပြောင်းနည်း

ငွေလွှဲသည့်အခါ အလုံခြုံဆုံးနည်းလမ်းသည် ဘဏ် သို့မဟုတ် စာတိုက်ကဲ့သို့သော တရားဝင် ငွေကြေးဝန်ဆောင်မှု ပေးသည့်ဌာနများကို အသုံးပြုသော နည်းလမ်းဖြစ်သည်။ ငွေလွှဲအကျိုးဆောင်များ(ပွဲစား)မှတစ်ဆင့် လွှဲခြင်းသည် မြန်ဆန်ပြီး ဝန်ဆောင်ခ သက်သာသည်ဟု ထင်ရသော်လည်း၊ ပွဲစားက ကြားမှ ငွေယူပြီး ထွက်ပြေးသည့် ကိစ္စရပ်များ အဖြစ်များပါသည်။ ငွေလိမ်ခံရပါက ပိုက်ဆံ ပြန်ရရန် လက်တွေ့၌ မဖြစ်နိုင်သည့်အတွက် ငွေလွှဲအကျိုးဆောင်များ(ပွဲစား)ဖြင့် လွှဲခြင်းကို ရှောင်ရှားသင့်ပါသည်။

သိရှိထားရန်!
Voice phishing(ဖုန်းဖြင့်ငွေလိမ်ခြင်း)

အများအားဖြင့် ဖုန်းဆက်ခြင်း၊ စာပို့ခြင်းဖြင့် ကာစတန်များထံ မဟုတ်မမှန်သည်များကို လုပ်ကြံပို့ပြီး ဘဏ်အပ်ငွေ သို့မဟုတ် ငွေသားများကို လွှဲပေးအောင် လုပ်ပြီး လိမ်လည်ရယူသော အပြုအမူဖြစ်သည်။

သားသမီးပြန်ပေးဆွဲခြင်းနှင့် မတော်တဆထိခိုက်မှု ဖြစ်သကဲ့သို့ ဟန်ဆောင်ခြင်း

သားသမီးနှင့် မိဘ၏ ဖုန်းနံပါတ် စသည်တို့ကို သိထားသော လူလိမ်မှ သားသမီး၏ ဖုန်းနံပါတ်ဖြင့် ခေါ်ဆိုသူနံပါတ် ပေါ်အောင်လုပ်ပြီး၊ မိဘများထံ ဆက်သွယ်ကာ သားသမီးမှ မတော်တဆမှု သို့မဟုတ် ပြန်ပေးဆွဲခံရသည့် အခြေအနေမျိုး ဟန်ဆောင်ဖန်တီးပြီး မိဘများဆီမှ ငွေကြေး လိမ်လည်တောင်းခံသော နည်းလမ်းဖြစ်ကာ ကျောင်းသွားသော သားသမီးအား ပြန်ပေးဆွဲထားသယောင်ဆောင်ခြင်း၊ စစ်မှုထမ်းနေသော သားမှာ မတော်တဆထိခိုက်မှု ဖြစ်သကဲ့သို့ ဖန်တီးခြင်း၊ ပညာသင်သွားနေသော သားသမီးအား ပြန်ပေးဆွဲခြင်း သို့မဟုတ် မတော်တဆထိခိုက်မှု ဖြစ်သကဲ့သို့ လိမ်ညာဖန်တီးခြင်း စသည့် ပုံစံများ ဖြစ်ပါသည်။

မက်ဆင်ဂျာဖြင့် အသိမိတ်ဆွေဟန်ဆောင်ပြီး ငွေလွှဲပေးရန် တောင်းဆိုခြင်း

အခြားသူ၏ အင်တာနက် မက်ဆင်ဂျာ အိုင်ဒီနှင့် လျှို့ဝှက်နံပါတ်ကို ခိုးယူ(ဟက်ကင်းလုပ်)ပြီး အကောင့်ဝင်ပြီးနောက် အကောင့်ထဲ ရှိသည့် မိသားစု၊ သူငယ်ချင်း စသည့် အသိမိတ်ဆွေများထံ 1:1 မက်ဆေ့ဖြင့်ပြောခြင်း သို့မဟုတ် စာတိုချန်ခြင်း စသည့် နည်းလမ်းများဖြင့် ငွေကြေး၊ ယာဉ်မတော်တဆမှု ညှိနှိုင်းခ အစရှိသော အရေးပေါ်ငွေကြေးများ တောင်းခံခြင်း၊ ၎င်းအား နစ်နာသူမှ ယုံပြီး ငွေလွှဲမိပါက ထိုငွေကို လိမ်ယူသွားခြင်း

ငွေကြေးစစ်ဆေးရေးဌာန အမည်ဖြင့် အရေးပေါ်အသိပေး မက်ဆေ့များ လိမ်ညာပို့ပြီး phishing siteထဲ ဝင်လာစေရန် လုပ်ကာ ငွေလိမ်ယူခြင်း

ငွေကြေးကုမ္ပဏီ သို့မဟုတ် ငွေကြေးစောင့်ကြည့်စစ်ဆေးရေးဌာနမှ ပို့သော ကြေညာစာ(လုံခြုံရေးမြှင့်တင်ရန်၊ ကိုယ်ရေးအချက်အလက် ပေါက်ကြားမှု စစ်ဆေးရန် စသဖြင့်)ကဲ့သို့ မက်ဆေ့များ ပို့ပြီး phishing siteထဲ ဝင်လာအောင် လုပ်ပြီးနောက် ဘဏ်အသုံးပြုခြင်းဆိုင်ရာ အချက်အလက်များကို ဖြည့်စွက်ခိုင်းပြီး ၎င်း အချက်အလက်များဖြင့် နစ်နာသူ အမည်ကို သုံးကာ ချေးငွေ ထုတ်ယူခြင်း စသည့် ငွေလိမ်နည်း

ဖုန်းပြောဆိုခြင်းဖြင့် telebanking အချက်အလက်များ ရယူပြီး ငွေလိမ်ယူခြင်း

အသက် 50~70ကျော် အသက်ကြီးရင့်သူများကို အဓိကထားကာ ဖုန်းဆက်သွယ်ပြောဆိုပြီး telebanking မန်ဘာဝင်ထားခြင်းရှိမရှိ စစ်ဆေးခြင်း သို့မဟုတ် မန်ဘာဝင်ခိုင်းခြင်း ပြုလုပ်ပြီးနောက် နာမည်အလွဲသုံးစားလုပ်ခြင်း၊ အချက်အလက် ပေါက်ကြားခြင်း၊ ပြစ်မှုများနှင့် ငြိစွန်းခြင်း စသော အမျိုးမျိုးသော ခေါင်းစဉ်ဖြင့် နစ်နာသူများကို လှည့်ဖျားကာ telebankingအတွက် လိုအပ်သော အချက်အလက်များ(နိုင်ငံသားမှတ်ပုံတင်နံပါတ်၊ ငွေလွှဲ လျှို့ဝှက်နံပါတ်၊ ဘဏ်စာအုပ်လျှို့ဝှက်နံပါတ်၊ လုံခြုံရေးကတ် serial နံပါတ်၊ လုံခြုံရေးကတ် ကုဒ် စသည်)ကို ရယူပြီး နစ်နာသူ ဘဏ်အကောင့်ထဲမှ ငွေများကို လူလိမ်အကောင့်ထဲကို လွှဲပြောင်းယူသော လိမ်နည်း

နစ်နာသူကို လိမ်ပြီး အလိုအလျောက်စက်သို့ သွားစေကာ ငွေလိမ်ယူခြင်း

အမှုစစ်ဌာန ဝန်ထမ်းအယောင်ဆောင်ပြီး နစ်နာသူထံ ဖုန်းဆက်ကာ နစ်နာသူ၏ ဘဏ်အကောင့်သည် ရာဇဝတ်မှုတွင် ပါဝင်ပတ်သက်နေသည့်အတွက် လုံခြုံရေးဆိုင်ရာများ လုပ်ဆောင်ရန် လိုအပ်သည်ဟု လိမ်ကာ ငွေသားထုတ်စက်သို့ သွားစေပြီး စက်ကို နှိပ်ခိုင်းပြီး ငွေလိမ်ယူနည်း

အကြွေးဝယ်ကတ် အချက်အလက်များ ရယူပြီး ARSကို အသုံးပြုသော ကတ်ချေးငွေဖြင့် ငွေလိမ်ယူခြင်း

နာမည်အလွဲသုံးစားလုပ်ခြင်း၊ အချက်အလက် ပေါက်ကြားခြင်း၊ ရာဇဝတ်မှုတွင် ပါဝင်ပတ်သက်နေခြင်း စသည့် အမျိုးမျိုးသော ခေါင်းစဉ်ဖြင့် နစ်နာသူအား လိမ်လည်ပြီး အကြွေးဝယ်ကတ် အချက်အလက်(ကတ်နံပါတ်၊ လျှို့ဝှက်နံပါတ်၊ CVC နံပါတ်)ကို ရယူပြီးနောက်၊ လူလိမ်သည် ARSမှ တဆင့် နစ်နာသူ၏ အမည်ဖြင့် ကတ်ချေးငွေ ရယူပြီး တစ်ဆက်တည်းတွင် နစ်နာသူထံ ဖုန်းပြန်ဆက်ပြီးနောက် ပြစ်မှုဆိုင်ရာငွေများ ငွေသွင်းထားကြောင်း လိမ်ညာပြောဆိုပြီး နစ်နစ်သူထံ လူလိမ်ဘဏ်အကောင့်ထဲသို့ ငွေလွှဲခိုင်းသော ငွေလိမ်နည်း

တိုင်ကြားရန် ဖုန်းနံပါတ်

ရဲစခန်းဌာန ကုဒ်နံပါတ်မလို☎112၊ အင်တာနက်မြှင့်တင်ရေးအဖွဲ့ ကုဒ်နံပါတ်မလို☎118၊ ငွေကြေးစောင့်ကြည့်စစ်ဆေးရေးဌာန ကုဒ်နံပါတ်မလို☎1332

အရင်းအမြစ်
အဆိုပါ လမ်းညွှန်စာအုပ်သည် “ဂုံးဂုံးနူရီ ပုံစံ 4 : အရင်းအမြစ်ဖော်ပြရန်+ကိုယ်ကျိုးအတွက် အသုံးပြုခြင်း မပြုရ+ပြောင်းလဲဖော်ပြခြင်း မပြုရ” သတ်မှတ်ချက်များပေါ် မူတည်ပြီး အသုံးပြုနိုင်ပါသည်။
အရင်အကြောင်းအရာ
နေထိုင်မှုဘဝ
နောက်အကြောင်းအရာ
သယ်ယူပို့ဆောင်ရေးနည်းလမ်း