ကိုရီးယားနိုင်ငံတွင်းနေထိုင်မှုလမ်းညွှန်

နိုင်ငံခြားသားများသည် ပြည်တွင်းသို့ ဝင်ရောက်သည့် ရည်ရွယ်ချက်အပေါ် မူတည်ပြီး၊ ရရှိထားသည့် ဗီဇာအမျိုးအစားအလိုက် လုပ်ငန်းခွင်ဝင်နိုင်ပါသည်။ ကိုရီးယားနိုင်ငံသားနှင့် လက်ထပ်ထားသူ(F-6)ဗီဇာဖြင့် ကိုရီးယားနိုင်ငံသို့ ဝင်ရောက်လာသူများသည် တရားဝင် အလုပ်လုပ်ခွင့် ရှိပါသည်။

လုပ်ငန်းခွင်ဝင်ရန်အတွက် ပထမဆုံး လုပ်ရမည့် ကိစ္စသည် လုပ်ငန်းခွင်ဝင်ရန် လိုမလို၊ မည်သည့် အလုပ်လုပ်လျှင် ကောင်းမည်၊ လုပ်ခလစာကို မည်သည့်နေရာတွင် အသုံးပြုမည် စသည်တို့ကို မိသားစုနှင့် ဆွေးနွေးတိုင်ပင်ကြည့်ရန် ဖြစ်ပါသည်။

နေထိုင်သည့် နေရာနှင့် အနီးဆုံးသော ဂိုယုံးစင်တာ၊ အမျိုးသမီးများအလုပ်သစ်စတင်မှုစင်တာ(saeil စင်တာ)၊ နိုင်ငံခြားသွေးနှောမိသားစု အထောက်အကူပြုစင်တာသို့ သွားရောက်ပြီး ကိုရီးယားနိုင်ငံသားနှင့် လက်ထပ်ထားသူ စသည့် နိုင်ငံခြားသားများအတွက် အလုပ်အကိုင်အခွင့်အလမ်းဆိုင်ရာ လမ်းညွှန်ချက်များ ရယူနိုင်ပါသည်။

ကိုရီးယားနိုင်ငံသားနှင့် လက်ထပ်ထားသူများအနေနှင့် လုပ်ငန်းခွင်ဝင်ရောက်လိုသည့်အချိန်တွင် အင်တာနက်ကို အသုံးပြုပါက ပိုမို အဆင်ပြေပါသည်။ ကိုရီးယားနိုင်ငံသားနှင့် လက်ထပ်ထားသူများအတွက် အလုပ်အကိုင် ရှာဖွေပေးသည့် ဝန်ဆောင်မှုများ ပေးနေသည့် ဌာနအများစုသည် အင်တာနက် ဟုမ်းပေ့ချ်များ ရှိပြီး၊ အိမ်မှလည်း အင်တာနက် အသုံးပြုကာ ကုမ္ပဏီလုပ်ငန်းများကို ရှာကြည့်နိုင်ပါသည်။

ဆိုးလ်မြို့တော်မှ ဖွင့်လှစ်ထားသည့် ဝက်ဘ်ဆိုက်ဖြစ်ပြီး ကိုရီးယားရောက် နိုင်ငံခြားသားများအတွက် အလုပ်အကိုင်ပြပွဲများနှင့် လုပ်ငန်းခွင်ဝင်ရောက်နိုင်ရေး အထောက်အကူများ၊ အလုပ်ခေါ်ဆိုမှု သတင်းများကို အင်္ဂလိပ်ဘာသာနှင့် တရုတ်ဘာသာဖြင့် တင်ပေးထားပါသည်။

အလုပ်ခန့်ထားရေးနှင့် အလုပ်သမားဝန်ကြီးဌာနမှ ဦးစီးပြီး ကိုရီးယားအလုပ်အကိုင်နှင့် လုပ်သားရှာဖွေရေးဝန်ဆောင်မှုဌာန(Keis)မှ ဖွင့်လှစ်ထားသော portal siteဖြစ်ပြီး၊ အလုပ်ခေါ်ဆိုမှု သတင်းများသာမက အလုပ်အကိုင် လမ်းကြောင်းများ၊ အသက်မွေးဝမ်းကျောင်းသင်တန်းများ စသည့် အလုံးစုံသော အလုပ်အကိုင် အချက်အလက်များကို တစ်နေရာတည်းတွင် စုံလင်စွာ ဖော်ပြပေးထားပါသည်။ တစ်ဦးချင်းစီ၏ လုပ်ငန်းအတွေ့အကြုံများ၊ သင်တန်းများ၊ လိုအပ်သည့် အရည်အချင်းများ စသည့် အချက်အလက်များကို big dataဖြင့် ခွဲခြမ်းစိတ်ဖြာကာ အလုပ်ရှာသူများနှင့် အသင့်တော်ဆုံး အလုပ်နေရာများကို ညွှန်ပြပေးပြီး၊ ထို အလုပ်အား အွန်လိုင်းမှ ကိုယ်တိုင် လျှောက်ထားနိုင်ပါသည်။ ထို့အပြင်၊ လူငယ်များနှင့် လူကြီးများအတွက် အလုပ်အကိုင် လမ်းကြောင်းနှင့် အတွေ့အကြုံ ပုံစံရေးဆွဲခြင်း၊ ဝန်ထမ်းခေါ်ယူခြင်းနှင့် အလုပ်ရှာဖွေခြင်း စသည်တို့ကို အကူအညီပေးရန်အတွက် အွန်လိုင်းမှ အလုပ်အကိုင်နှင့်ပတ်သက်သည့် စိတ်နေသဘောထားကို စစ်ဆေးခြင်း၊ အလုပ်အကိုင် အချက်အလက်များ၊ ပညာအရည်အချင်းဆိုင်ရာ အချက်အလက်များ၊ အလုပ်အကိုင် လမ်းကြောင်း ဆွေးနွေးခြင်းများ စသည့် ဝန်ဆောင်မှုများပေးနေပြီး ဆီလျော်သော အလုပ်အကိုင် လမ်းကြောင်းကို ရွေးချယ်နိုင်စေရန် ကူညီပေးပါသည်။

တစ်နိုင်ငံလုံးအတိုင်းအတာဖြင့် ကွန်ယက်ဖွဲ့စည်းထားပြီး အလုပ်အကိုင်နေရာ၊ လူမှုဖူလုံရေး၊ အသေးစားငွေကြေးဝန်ဆောင်မှုများကို one-stop ဝန်ဆောင်မှုအဖြစ် ပံ့ပိုးပေးလျက်ရှိပြီး၊ အလုပ်ရှာနေသူများအနေဖြင့် လုပ်ငန်းခွင်သို့ အောင်မြင်စွာ ဝင်ရောက်နိုင်သည့်အချိန်အထိ လိုအပ်သော အကူအညီများကို စဉ်ဆက်မပြတ် ရယူနိုင်ပါသည်။ အလုပ်အကိုင်နှင့်ဖူလုံရေး PLUSစင်တာ ဝက်ဘ်ဆိုက်မှတစ်ဆင့် နေထိုင်သည့် နေရာနှင့် အနီးဆုံးသော အလုပ်အကိုင်နှင့်ဖူလုံရေး PLUSစင်တာ ဟုမ်းပေ့ချ်သို့ တန်းဝင်နိုင်ပါသည်။ အလုပ်အကိုင်နှင့်ဖူလုံရေး PLUSစင်တာတွင် ကိုရီးယားနိုင်ငံသားနှင့် လက်ထပ်ထားသူများ၏ အလုပ်လုပ်လိုသော စိတ်ဆန္ဒနှင့် အလုပ်ရှာဖွေခြင်း အရည်အချင်းများ မြှင့်တင်ပေးခြင်း၊ လူမှုဖူလုံရေး/ငွေကြေး ဝန်ဆောင်မှုများအတွက် ‘ကိုရီးယားနိုင်ငံသားနှင့် လက်ထပ်ထားသော် အမျိုးသမီးများအတွက် အလုပ်အကိုင် လမ်းကြောင်း ပြသပေးသည့် ပရိုဂရမ်(WiCi)’ အပါအဝင် ကာလတို အဖွဲ့လိုက်ဆွေးနွေးမှု ပရိုဂရမ်၊ လုပ်ငန်းခွင်ဝင်ရောက်ခြင်းဆိုင်ရာ အထူးသင်ကြားပို့ချမှုများ စသည့် အမျိုးမျိုးသော အလုပ်အကိုင် လမ်းကြောင်းဆိုင်ရာ ပရိုဂရမ်များကို စီစဉ်ပေးလျက် ရှိပြီး၊ အင်တာဗျူးဖြေသည့်အခါ ကုမ္ပဏီသို့ သွားရောက်ရန် အခက်အခဲ ရှိသော ကိုရီးယားနိုင်ငံသားနှင့် လက်ထပ်ထားသူများအတွက် စင်တာဝန်ထမ်းမှ အတူအဖော်လိုက်ပေးသည့် ဝန်ဆောင်မှုလည်း ပေးပါသည်။

အလုပ်နှင့် ပတ်သက်သည့် အမျိုးမျိုးသော သင်တန်းများနှင့် အသက်မွေးဝမ်းကျောင်းသင်တန်းများ၊ အမျိုးသမီးအလုပ်သမားများ၏ အခက်အခဲများ နားထောင်ဆွေးနွေးပေးခြင်း စသည်တို့ကို ဆောင်ရွက်ပေးပြီး၊ အလုပ်အကိုင် ရှာဖွေချိတ်ဆက်ပေးသော အမျိုးသမီးများ လုပ်ငန်းခွင်ဝင်ရောက်နိုင်ရေး အထွေထွေ အထောက်အကူပြုဌာနဖြစ်ပါသည်။

ကိုယ်ပိုင်အုပ်ချုပ်ခွင့်ရဒေသများတွင်လည်း အခမဲ့ အလုပ်အကိုင် ရှာဖွေချိတ်ဆက်ပေးသည့် ဌာနများကို ဖွင့်လှစ်ပေးထားပါသည်(ကိုယ်ပိုင်အုပ်ချုပ်ခွင့်ရဒေသ ဟုမ်းပေ့ချ် ကိုးကားရန်။)။

အသက်မွေးဝမ်းကျောင်းသင်တန်းများသည် လုပ်ငန်းခွင်ဝင်ရောက်ရန် သို့မဟုတ် ကိုယ်ပိုင်လုပ်ငန်း စတင်ရန် ဆန္ဒရှိသူများအတွက် လိုအပ်သော နည်းပညာနှင့် အရည်အချင်းများကို လေ့ကျင့်သင်ယူနိုင်စေရန် ကူညီပေးသော စနစ်ဖြစ်ပါသည်။ နိုင်ငံခြားသားများအနေဖြင့် အလုပ်အကိုင်အာမခံ ဝင်ထားဖူးသည့် သူမှသာ အထောက်အပံ့များ ရနိုင်သော်လည်း ကိုရီးယားနိုင်ငံသားနှင့် လက်ထပ်ထားသူများမှာ အလုပ်အကိုင်အာမခံ မရှိသော်လည်း အထောက်အပံ့များ ရနိုင်ပါသည်။

ဘဝတစ်လျှောက်လုံး အလုပ်လုပ်နိုင်သော အရည်အချင်းများ ဖြည့်တင်း မြှင့်တင်နိုင်ပေးရန်အတွက် ပြည်သူများ ကိုယ်တိုင် အလုပ်အကိုင် အရည်အသွေးမြှင့်တင်ရေး လေ့ကျင့်မှုများ လုပ်နိုင်စေရန် သင်တန်းကြေး စသည်တို့ကို ထောက်ပံ့ပေးသည့် စနစ်ဖြစ်ပါသည်။

အချို့သော သူများ*မှအပ ပြည်သူတိုင်း မည်သူမဆို လျှောက်ထားနိုင်ပါသည်။

• အစိုးရဝန်ထမ်း၊ ပုဂ္ဂလိကကျောင်း ပညာရေးဝန်ထမ်းများ၊ နှစ်စဉ် ရောင်းအား ဝမ် သိန်း4ထောင်နှင့် အထက်ရှိသော ကိုယ်ပိုင်လုပ်ငန်းရှင်များ၊ ပျမ်းမျှလစာ ဝမ် သိန်း30နှင့်အထက် ရနေသော ကုမ္ပဏီဝန်ထမ်းများ(အသက် 45နှစ်အထက်)၊ ပျမ်းမျှလစာ ဝမ် သိန်း50နှင့် အထက် ရရှိနေသော အထူးအုပ်စုဝင်အလုပ်သမားများ၊ ဘွဲ့ရရန် 2နှစ်ကျော် လိုသေးသည့် တက္ကသိုလ်ကျောင်းသားများ စသည်