ကိုရီးယားနိုင်ငံတွင်းနေထိုင်မှုလမ်းညွှန်

ဒေသန္တရကျန်းမာရေးဌာနသည် ဒေသခံပြည်သူများ ကျန်းမာရေး ကောင်းမွန်စေရန်၊ ရောဂါများ ကာကွယ်ရန်နှင့် စောင့်ရှောက်ရန် ဖွဲ့စည်းထားသော အစိုးရကျန်းမာရေးဌာနဖြစ်ပါသည်။ ဒေသန္တရကျန်းမာရေးဌာန၏ တာဝန်သည် ကျန်းမာရေးလုပ်ငန်းများ၊ ကူးစက်ရောဂါ ကာကွယ်စောင့်ရှောက်ခြင်း၊ ရောဂါစမ်းသပ်ကုသခြင်း၊ လက်တွေ့စမ်းသပ်ခြင်းနှင့် စစ်ဆေးခြင်း၊ စားသောက်ကုန်ဆိုင်ရာ ပြည်သူ့ကျန်းမာရေးစောင့်ရှောက်မှု၊ ဆေးဝါးလမ်းညွှန်ခြင်းနှင့် ကြီးကြပ်ခြင်း၊ သာမန်အုပ်ချုပ်ရေးလုပ်ငန်းများ စသည်တို့ ရှိပြီး ၎င်းတို့အထဲမှ ရောဂါစမ်းသပ်ကုသမှုအပိုင်းတွင် နာတာရှည်ရောဂါကုသမှုနှင့် အမျိုးမျိုးသော ကျန်းမားရေးစစ်ဆေးခြင်းများ၊ ကိုယ်ခန္ဓာလေ့ကျင့်ခန်းကုထုံး၊ သွားနှင့်ခံတွင်း စမ်းသပ်ကုသမှု၊ တိုင်းရင်းဆေးကုသမှု စသည့် ဆေးဘက်ဆိုင်ရာ ဝန်ဆောင်မှုများပေးပါသည်။ သို့သော် ဒေသန္တရကျန်းမာရေးဌာနများကို အခြေခံကိုယ်ပိုင်အုပ်ချုပ်ခွင့်ရဒေသအုပ်ချုပ်ရေးမှူးမှ ဖွဲ့စည်းဖွင့်လှစ်ခိုင်းထားသည့် ဒေသန္တရကျန်းမာရေးဌာနပေါ် မူတည်ပြီး ဆေးကုသမှုနယ်ပယ်၊ အကြောင်းအရာ၊ ကုန်ကျစရိတ် စသည်တို့ အနည်းငယ် ကွာခြားနိုင်သည့်အတွက် မသွားမီ ဒေသဆိုင်ရာ ဒေသန္တရကျန်းမာရေးဌာနသို့ ဆက်သွယ်မေးမြန်းစုံစမ်းရမည်ဖြစ်ပါသည်။

သူနာပြု၊ ကိုယ်ကာယလေ့ကျင့်ခန်းကုထုံးပညာရှင်၊ အာဟာရပညာရှင် စသည့် ဒေသန္တရကျန်းမာရေးဌာန၏ အိမ်အရောက် ကျန်းမာရေးကျွမ်းကျင်ပညာရှင်များမှ ကျန်းမာရေးစောင့်ရှောက်မှုဝန်ဆောင်မှု အသုံးပြုရန် ခက်ခဲသော လူမှုရေး၊ ယဉ်ကျေးမှု၊ စီးပွားရေး ချို့တဲ့သည့်အလွှာနှင့် အသက် 65နှစ်နှင့်အထက် တစ်ကိုယ်တည်းနေသော သက်ကြီးရွယ်အိုများ၊ အသက် 75နှစ်နှင့်အထက် သက်ကြီးရွယ်အို ဇနီးမောင်နှံ အိမ်ထောင်စုများကို အဓိကထားကာ အိမ်သို့ ကိုယ်တိုင် လာရောက်ပြီး နာတာရှည်ရောဂါ ထိန်းသိမ်းစောင့်ရှောက်မှု စသည့် ကျန်းမာရေးစောင့်ရှောက်မှုဝန်ဆောင်မှုများ ပေးနေသော အစီအစဥ်ဖြစ်ပါသည်။

စိတ်ကျန်းမာရေး ဖူလုံရေးစင်တာသည် စိတ်ရောဂါ ကာကွယ်ရေးနှင့် စိတ်ရောဂါဝေဒနာရှင်များ ရှာဖွေခြင်း၊ ဆွေးနွေးပေးခြင်း၊ ပြန်လည်ကောင်းမွန်ရေးဝန်ဆောင်မှုများ ပေးခြင်း၊ အခြေအနေစီမံခန့်ခွဲရေး၊ စိတ်ကျန်းမာရေးဆိုင်ရာ သင်တန်းပေးခြင်းနှင့် ကြော်ငြာခြင်း စသည့် တာဝန်များကို ဆောင်ရွက်နေသော အစိုးရဖူလုံရေးဌာနဖြစ်ပါသည်။ စိတ်ကျရောဂါ၊ စိတ်မတည်မငြိမ်ဖြစ်ခြင်း၊ ဆေးစွဲခြင်း စသည်တို့ကြောင့် အခက်အခဲကြုံနေပါက နီးစပ်ရာ စိတ်ကျန်းမာရေးဖူလုံရေးစင်တာတွင် ဆွေးနွေးမှုနှင့် လမ်းညွှန်မှုများ ခံယူနိုင်ပါသည်။