ကိုရီးယားနိုင်ငံတွင်းနေထိုင်မှုလမ်းညွှန်

နေ့စဉ်ဘဝတွင် သွားဖြစ်သည့် အုပ်ချုပ်ရေးဌာန အများစုမှာ မြို့နယ်၊ ရပ်ကွက်ရုံး နှင့် ပြည်သူ့စင်တာ၊ မြို့၊ ခရိုင်၊ မြို့နယ်ရုံးများ ဖြစ်ပါသည်။ မြို့နယ်၊ ရပ်ကွက်ရုံး နှင့် ပြည်သူ့စင်တာ၊ မြို့၊ ခရိုင်၊ မြို့နယ်ရုံးများသည် ပြည်သူများ၏ ကျန်းမာရေးနှင့် ဖူလုံရေး၊ အများပိုင်အဆောက်အဦများ ထိန်းသိမ်းခြင်း၊ အမျိုးမျိုးသော ထောက်ခံစာများ ထုတ်ပေးခြင်းနှင့် အကြောင်းကြားခြင်း စသည့် လုပ်ငန်းဆောင်တာများ ဆောင်ရွက်ပေးပါသည်။ မြို့နယ်၊ ရပ်ကွက်ရုံး နှင့် ပြည်သူ့စင်တာမှ ယဉ်ကျေးမှုလက်ချာများ စသည့် ပြည်သူများအတွက် အမျိုးမျိုးသော ပရိုဂရမ်များကို စီမံဖွင့်လှစ်ပေးခြင်းများလည်း လုပ်ဆောင်ပေးပါသည်။
ယခု‌‌နောက်ပိုင်းတွင်မူ ရုံးဌာနများသို့ ကိုယ်တိုင် မသွားလည်း အဓိကမြေအောက်ရထားဘူတာကြီးများရှိ အလိုအလျောက်ပြည်သူ့ထောက်ခံစာ ထုတ်စက် သို့မဟုတ် အစိုးရပြည်သူ့ဝန်ဆောင်မှု siteဖြစ်သည့် minwon24 အင်တာနက် ဟုမ်းပေ့ချ်(www.minwon.go.kr)မှတဆင့် လိုအပ်သည့် စာရွက်စာတမ်းများကို ထုတ်ယူနိုင်ပါသည်။ သို့သော် စာရွက်စာတမ်း အားလုံးကို အလိုအလျောက်ပြည်သူ့ထောက်ခံစာ ထုတ်စက် သို့မဟုတ် အင်တာနက်မှတဆင့် ထုတ်၍ရခြင်းမျိုး မဟုတ်ပါ။ အင်တာနက်မှတဆင့် ရုံးပိုင်းဆိုင်ရာ စာရွက်စာတမ်းများကို ထုတ်လိုပါက စာရွက်ထုတ်ရန် ပရင့်တာ မဖြစ်မနေ ရှိရမည်ဖြစ်ပြီး မည်သူမည်ဝါဖြစ်ကြောင်း စစ်ဆေးအတည်ပြုရန် ဒီဂျစ်တယ်ဆာတီဖီကိတ် လိုအပ်သည့် အခါမျိုးလည်း ရှိပါသည်။ အရေးကြီး စာရွက်စာတမ်းများကို ထုတ်မည့်အခါမျိုးတွင်မူ စစ်ဆေးမှုများကို အရင်လုပ်ပါသည်။

လိမ်လည်ခြင်း၊ အကြမ်းဖက်ခြင်း၊ ဓားပြတိုက်ခြင်းကဲ့သို့သော ရာဇဝတ်မှုများ ကြုံရသည့်အခါနှင့် ယာဉ်မတော်တဆမှု ဖြစ်သည့်အခါ၊ သို့မဟုတ် ထိုကိစ္စများကို မျက်မြင်တွေ့သည့်အခါတွင် ☎112သို့ ဖုန်းဆက် တိုင်ကြားခြင်း သို့မဟုတ် လူကိုယ်တိုင် ရဲစခန်းသို့ သွားပြီး တိုင်ကြားနိုင်ပါသည်။ အများပြည်သူသုံး တယ်လီဖုန်းဖြင့် တိုင်ကြားသည့်အခါ၌ အနီရောင် အရေးပေါ်ဖုန်းခေါ်ဆိုမှု ခလုတ်ကို နှိပ်ပြီးနောက် ☎112ကို နှိပ်နိုင်ပြီး၊ ရိုးရိုးဖုန်း သို့မဟုတ် လက်ကိုင်ဖုန်းများဖြင့် တိုင်းကြားပါက ကုဒ်နံပါတ် မလိုဘဲ ☎112ကို နှိပ်ပြီး ဆက်သွယ် အကြောင်းကြားနိုင်ပါသည်။
ရာဇဝတ်မှုကြုံရပြီး တိုင်ကြားသည့်အခါတွင် တိုင်ကြားသူ၏ နေရပ်လိပ်စာ၊ အမည်၊ ဖုန်းနံပါတ်နှင့်တကွ မည်သည့်အချိန်၊ မည်သည့်နေရာတွင်၊ မည်သည့် ကိစ္စမျိုး ကြုံခဲ့ရသည်ကို တိကျသေချာစွာ ရှင်းပြပြီး၊ တရားခံ၏ ပုံစံနှင့် ဝတ်စားဆင်ယင်မှု သို့မဟုတ် ထူးခြားချက်၊ ထွက်ပြေးသွားသည့် ဦးတည်ဘက်နှင့် မည်သို့ ထွက်ပြေးသွားခဲ့သည်ကို ပြောပြပေးပါက များစွာ အထောက်အကူဖြစ်စေပါသည်။

မီးလောင်သည့်အခါ၊ တစ်စုံတစ်ယောက်ကို ဆေးရုံသို့ အမြန် ပို့ဆောင်ရမည့် အခါ၊ သို့မဟုတ် ထို့ကဲ့သို့သော အခြေအနေကို မျက်မြင်တွေ့သည့်အခါမျိုးတွင် ☎119သို့ အကြောင်းကြားနိုင်ပါသည်။ အများပြည်သူသုံး တယ်လီဖုန်းဖြင့် အကြောင်းကြားသည့်အခါ အနီရောင် အရေးပေါ်ဖုန်းခေါ်ဆိုမှု ခလုတ်ကို နှိပ်ပြီးနောက်☎119ကို နှိပ်နိုင်ပြီး၊ ရိုးရိုးဖုန်း သို့မဟုတ် လက်ကိုင်ဖုန်းဖြင့် အကြောင်းကြားပါက ကုဒ်နံပါတ်မလိုဘဲ ☎119ကို တန်းနှိပ်ပြီး အကြောင်းကြားနိုင်ပါသည်။
မီးလောင်မှု တိုင်ကြားသည့်အခါမျိုးတွင် အိမ်၏ တည်နေရာနှင့် အထပ်၊ အမျိုးအစားနှင့်တကွ အနီးနားရှိ သိသာထင်ရှားသော အဆောက်အအုံများကို ပြောပြပြီး၊ တစ်စုံတစ်ယောက်အား ဆေးရုံသို့ အမြန်ဆုံး ပို့ဆောင်ရမည့် အခြေအနေမျိုးတွင်မူ နေမကောင်းဖြစ်သူ၏ အခြေခံအချက်အလက်များကို တိကျစွာ ပြောပြပေးကာ 119 ကယ်ဆယ်ရေးအဖွဲ့များ ရောက်သည့် အချိန်အထိ ဆွေးနွေးပေးသူနှင့် ဆက်တိုက် ဖုန်းပြော၍ ရုတ်တရက် ဖြစ်ပေါ်လာနိုင်သည့် အခြေအနေများကို ဖြေရှင်းနိုင်အောင် ဆောင်ရွက်ရပါမည်။

ချောစာများ၊ ပါဆယ်ထုပ်များကို ပို့သည့်အခါ၌ အိမ် အနီးနားရှိ စာတိုက်ကို အသုံးပြုနိုင်ပါသည်။ စာတိုက်မှ ပြည်တွင်းစာပို့လုပ်ငန်းနှင့် အပြည်ပြည်ဆိုင်ရာစာပို့လုပ်ငန်း ဝန်ဆောင်မှုများ ဆောင်ရွက်ပေးနေပြီး၊ ဘဏ်ကဲ့သို့ ငွေကြေးဌာနတစ်ခု၏ လုပ်ငန်းဆောင်တာများလည်း လုပ်ပေးလျက်ရှိပါသည်။ အပြည်ပြည်ဆိုင်ရာစာပို့လုပ်ငန်း ဝန်ဆောင်မှုအား အသုံးပြုသည့်အခါတွင် ပြည်ပသို့ ပစ္စည်းများ အမြန်ပို့နိုင်သော အပြည်ပြည်ဆိုင်ရာ အမြန်ချောပို့လုပ်ငန်း(EMS)ကို အသုံးပြုနိုင်ပါသည်။

ပုံမှန်အားဖြင့် စာတိုက်ချောပို့ပစ္စည်းများကို အပ်နှံပြီး 3ရက်အတွင်း ပို့ဆောင်ပေးပါသည်။ ကျွန်းဒေသများ၊ တောင်တန်းဒေသများသို့ ပစ္စည်းများရောက်ရှိရန် အချိန် အနည်းငယ် ပိုကြာမြင့်နိုင်ပါသည်။ ပို့ခသည် ပို့ဆောင်သည့် ဒေသအပေါ် မူတည်ပြီး ကွာခြားပါသည်။ အခြေခံ အလေးချိန်ထက် ကျော်လွန်ခြင်း သို့မဟုတ် အရွယ်အစား ကြီးမားသော ပစ္စည်းများ ပို့သည့်အခါများတွင် ၎င်းနှင့် ညီမျှသော ပို့ခကို ပေးဆောင်ရမည် ဖြစ်ပါသည်။

ချောထုပ်များကို စာတိုက်ကောင်တာတွင် တိုက်ရိုက် သွားရောက် အပ်နှံပို့ဆောင်ခြင်းနှင့် လျှောက်ထားပါက အလုပ်ခွင် သို့မဟုတ် အိမ်သို့အရောက် သယ်ဆောင်ပေးသည့် ဝန်ဆောင်မှုများ ရှိပါသည်။

အပြည်ပြည်ဆိုင်ရာ စာပို့လုပ်ငန်းသည် လေကြောင်းပါဆယ်နှင့် ရေကြောင်းပါဆယ်၊ အပြည်ပြည်ဆိုင်ရာ အမြန်ချောပို့လုပ်ငန်းEMS၊ EMS ပရီမီယမ်တို့ ရှိပါသည်။ EMS ဆိုသည်မှာ ချောစာများ၊ စာရွက်စာတမ်းများ၊ ကုန်ပစ္စည်း စသည်တို့ကို တစ်ကမ္ဘာလုံးရှိ နိုင်ငံ 143 နိုင်ငံသို့ မြန်ဆန်တိကျစွာ ပို့ဆောင်ပေးနေသော ဝန်ဆောင်မှုတစ်ခုဖြစ်ကာ အများဆုံး 30kgအထိ ပို့ဆောင်နိုင်ပါသည်။ ပို့ဆောင်နိုင်သည့် ပစ္စည်းများကတော့ ချောစာ၊ စာရွက်စာတမ်း၊ letter of credit, စာအုပ်စာပေများ၊ ငွေကြေးဌာနများ၏ လဲလှယ်ချက်လက်မှတ်များ၊ ကုန်ပစ္စည်းနမူနာများ၊ ပစ္စည်း အမျိုးမျိုး စသည်တို့ ဖြစ်ပါသည်။ အာဂျင်တီးနား၊ ဘင်္ဂလားဒေ့ချ် စသည့် နိုင်ငံ အချို့ကိုတော့ ပို့ဆောင်နိုင်သည့် အလေးချိန်ကို 20kgအောက် သတ်မှတ်ထားပါသည်။ နောက်ပြီး နိုင်ငံအလိုက် တားမြစ်ထားသော ပစ္စည်းများလည်း ရှိသည့်အတွက် ကြိုပြီး စုံစမ်းမေးမြန်းရန် လိုအပ်ပါသည်။

စာကြည့်တိုက်တွင် စာအုပ်စာပေများ၊ ရုပ်မြင်သံကြား အချက်အလက်များ စသဖြင့် အမျိုးမျိုးသော အချက်အလက်များကို စုဆောင်း၊ သိမ်းဆည်းထားပြီး ဒေသနေပြည်သူများအတွက် စာပေလေ့လာခြင်း၊ ယဉ်ကျေးမှုဆိုင်ရာများ၊ သက်မွေးဝမ်းကျောင်း ပညာရေးများတွင် အထောက်အကူပြုနေသော ဌာနဖြစ်ပါသည်။ အများစုသော မြို့၊ ခရိုင်၊ မြို့နယ်၊ ရပ်ကွက် ဒေသများမှာ စာကြည့်တိုက်များ ဖွင့်လှစ်ထားပါသည်။ စာကြည့်တိုက်မှာ အခမဲ့ အချက်အလက်များ ဖတ်ရှုခြင်း၊ ငှားရမ်းခြင်းများ လုပ်နိုင်ပြီး၊ အမျိုးမျိုးသော ရုပ်မြင်သံကြား အချက်အလက်များကိုလည်း အသုံးပြုနိုင်ပါသည်။ အိမ်နှင့် နီးသော စာကြည့်တိုက်များကို မြို့၊ ခရိုင်၊ မြို့နယ်ရုံးများတွင် စုံစမ်းမေးမြန်းနိုင်ပါသည်။