ကိုရီးယားနိုင်ငံတွင်းနေထိုင်မှုလမ်းညွှန်

ကိုရီးယားနိုင်ငံ၏ တက္ကသိုလ်များသည် 4နှစ် သင်ယူရသော တက္ကသိုလ်နှင့် 2~3နှစ် သင်ယူရသော အသက်မွေးဝမ်းကြောင်းတက္ကသိုလ်ဟူ၍ ရှိပါသည်။ များသောအားဖြင့် 4နှစ် တက်ရသည့် တက္ကသိုလ်များတွင် အလုပ်အကိုင်ထက် အထူးပြုဘာသာရပ်ကို သင်ယူလေ့လာခြင်းဖြစ်ပြီး၊ 2နှစ် တက်ရသည့် အသက်မွေးဝမ်းကြောင်း တက္ကသိုလ်များတွင်မူ အလုပ်အကိုင်နှင့် သက်ဆိုင်သော နည်းပညာများကို သင်ယူရပါသည်။ တက္ကသိုလ် ဆက်တက်လိုသည့် အခါတွင် ကျောင်းသားမှတ်တမ်းကို အဓိကထား ခေါ်ယူသည့် ကျောင်းဝင်ခွင့်နှင့် တက္ကသိုလ်ဝင်တန်း စာမေးပွဲရလဒ်ကို အဓိကထား ခေါ်ယူသည့် ကျောင်းဝင်ခွင့်များကို လျှောက်ထားနိုင်ပါသည်။။ ကျောင်း၊ ကျောင်းဝင်ခွင့်ပုံစံ၊ ခေါ်ယူသည့်ဌာနများအလိုက် ကျောင်းသား ရွေးချယ်သည့် နည်းလမ်းများသည် အနည်းငယ် ကွာခြားသည့်အတွက် ကျောင်းသားများအနေဖြင့် တက္ကသိုလ်အလိုက် ဖော်ပြထားသည့် ကျောင်းသားခေါ်ယူမှုလမ်းညွှန်များကို သေချာကြည့်ရှုပြီး လျှောက်ထားရမည် ဖြစ်ပါသည်။။ အချို့ တက္ကသိုလ်များတွင်မူ ‘နိုင်ငံခြားသွေးနှောမိသားစုမှ သားသမီးများ’ကို လျှောက်ထားခွင့်တစ်ခုအနေနှင့် သတ်မှတ်ပေးသော ဝင်ခွင့်ပုံစံတစ်ခု ထားပေးသော ကျောင်းများလည်း ရှိပြီး၊ ‘မိဘ နှစ်ဦးလုံး နိုင်ငံခြားသားဖြစ်သည့် နိုင်ငံခြားသား’နှင့် ‘နိုင်ငံခြားမှ ကိုရီးယားနိုင်ငံ မူလတန်း၊ အလယ်တန်းကျောင်းပညာရေးနှင့် တူညီသော ကျောင်းသင်ရိုး(12နှစ်) အပြီးအစီး တက်ရောက်ခဲ့သည့် ပြည်ပရောက် ကိုရီးယားနိုင်ငံသား၊ နိုင်ငံခြားသား၊ ကိုရီးယားနိုင်ငံသားခံယူထားသူ’ ဖြစ်ပါက ‘ပြည်ပရောက်ကိုရီးယားနိုင်ငံသားနှင့် နိုင်ငံခြားသား အထူးဝင်ခွင့်ပုံစံ’ တွင် ဝင်ရောက်ဖြေဆိုနိုင်ပါသည်။

တက္ကသိုလ်ကတော့ 4နှစ် တက်ရသည့် တက္ကသိုလ်၊ စက်မှုလုပ်ငန်းဆိုင်ရာ တက္ကသိုလ်၊ ပညာရေးတက္ကသိုလ်(ဆရာဖြစ်တက္ကသိုလ်)၊ ရုပ်သံလွှင့်သင်ကြားရေးတက္ကသိုလ်နှင့် ဆိုက်ဘာတက္ကသိုလ်၊ 2~3နှစ် တက်ရသည့် အသက်မွေးဝမ်းကြောင်းတက္ကသိုလ်၊ နည်းပညာတက္ကသိုလ် စသည်တို့ ရှိပါသည်။

တက္ကသိုလ်ကျူရှင်ခများသည် နိုင်ငံလုံးဆိုင်ရာ၊ အများပြည်သူ သို့မဟုတ် ပုဂ္ဂလိက တက္ကသိုလ်ဖြစ်ခြင်းအပေါ် မူတည်၍ ကွဲပြားပြီး ကျောင်းသားကျောင်းသူ တစ်ဦးချင်းစီသည် ယေဘုယျအားဖြင့် ကိုယ်တိုင်ပေးချေရပါမည်။ ငွေရေးကြေးရေး အခက်အခဲရှိသော ကျောင်းသားကျောင်းသူများကို ပံ့ပိုးပေးရန်အတွက် အစိုးရနှင့် တက္ကသိုလ်များသည် ပညာသင်ဆု ပရိုဂရမ် အမျိုးမျိုးကို ပေးပါသည်။ အစိုးရက ပံ့ပိုးပေးသော အဓိက ပညာသင်ဆုများတွင် နိုင်ငံလုံးဆိုင်ရာ ပညာသင်ဆု (National Scholarship) နှင့် တက္ကသိုလ်ကျောင်းသားကျောင်းသူ အလုပ်-စာသင် ပညာသင်ဆု (University Student Work-Study Scholarship) တို့ ပါဝင်ပါသည်။ သတ်မှတ်ချက်နှင့်ညီသော ရရှိနိုင်သူများမှာ ပြည်တွင်းတက္ကသိုလ်များတွင် ကျောင်းအပ်ထားသည့် ကိုရီးယား နိုင်ငံသားများ ဖြစ်ပါသည်။ အသေးစိတ် အချက်အလက်ကို ကိုရီးယား ကျောင်းသားကျောင်းသူ အကူအညီ ဖောင်ဒေးရှင်း (Korea Student Aid Foundation) ဝဘ်ဆိုက် (www.kosaf.go.kr) တွင် တွေ့နိုင်ပါသည်။တက္ကသိုလ်တွင်းနှင့် ပြင်ပတို့တွင် ကမ်းလှမ်းသော အခြားပညာသင်ဆုများကို ရရှိရန်အတွက် ပညာသင်ဆု အမျိုးအစားများနှင့် လျှောက်ထားမှုနည်းလမ်းများအကြောင်း အချက်အလက် အမျိုးမျိုးကို ရရှိနိုင်ရန် ကျောင်းသားကျောင်းသူများသည် ၎င်းတို့၏ လက်ရှိတက္ကသိုလ်ရှိ ပညာသင်ဆု ပံ့ပိုးရေးဌာနတွင် စုံစမ်းမေးမြန်းနိုင်ပါသည်။