ကိုရီးယားနိုင်ငံတွင်းနေထိုင်မှုလမ်းညွှန်

ကိုရီးယားလူမျိုးများသည် အတူတကွ စုဝေးပြီး စားသောက်ခြင်းကို နှစ်သက်ကြပြီး မျှဝေ စားသောက်ခြင်းကို ပျော်မွေ့ကြပါသည်။ ပုံမှန်အားဖြင့် ဧည့်သည်များ ဖိတ်ကြားထားလျှင် သာမန်စားနေကျပုံစံထက် ပိုမို ကောင်းမွန်သော အစားအစာများကို ပြင်ဆင်ပြီး ဧည့်ခံတတ်ကြပါသည်။ ကိုရီးယားအစားအစာများတွင် အဓိကအားဖြင့် ထမင်း၊ အရည်သောက်ဟင်းနှင့် အရံဟင်းလျာများပါဝင်ပါသည်။ အရည်သောက်ဟင်း အမျိုးအစားများတွင် စွပ်ပြုတ်ဟင်း၊ အရည်ဟင်းများ ရှိပြီး၊ အရံဟင်းလျာများထဲတွင်မူ အရွက်သုပ်များ၊ ပေါင်းထားသည့်ဟင်းများ၊ ရေခမ်းချက်ဟင်းများ၊ အကင်များ၊ အကြော်အလှော်များ၊ ဆီကြော်များ ‌ဂျောန်ခေါ် မုန့်နှစ်ဖြင့် ကြော်ထားသည့် အစားအစာများ စသည်တို့ ရှိပါသည်။ အရံဟင်းများ၏ ကိုယ်စားပြုဟင်းအနေဖြင့် ဂင်ချီ အမျိုးမျိုး ဖြစ်ပါသည်။ ထမင်း အစားထိုးအနေနှင့် ခေါက်ဆွဲ(မုန့်ဖက်ဟင်းရည်၊ ခေါက်ဆွဲအေး စသည်)၊ ဆူဂျယ်ဗီ(ဂျုံဖက်ဟင်းရည်)၊ ဆန်မုန့် စသည်တို့ ရှိပါသည်။ တဖြည်းဖြည်းနှင့် မောင်တစ်ထမ်းမယ်တစ်ရွက် အလုပ်လုပ်ကြသော အိမ်ထောင်သည်များ တိုးလာပြီး မိသားစုပုံစံမှာလည်း ပြောင်းလဲလာခြင်းကြောင့် 1ယောက်စာ၊ အလွယ်စား အစားအစာများ၊ deliveryအစားအစာများ စသည်တို့ များပြားလာလျက် ရှိပါသည်။

ဆန်ကို ရေဆူစေပြီး ချက်ကြသော အရှေ့တောင်အာရှဒေသမှ ထမင်းထက် ပိုစေးပါသည်။ အစပိုင်းတွင် အစာမကြေခြင်း၊ ဗိုက်အောင့်ခြင်းများ ကြုံရနိုင်ပါသည်။ တစ်ပတ်ခန့် ကြိုးစားပြီး စားကြည့်လိုက်လျှင် ကိုရီးယားထမင်းနှင့် အဆင်ပြေလာနိုင်ပါသည်။

ကိုရီးယားလူမျိုးများသည် ပုံမှန်အားဖြင့် အရွက်၊ ငါး၊ အသားပါဝင်သော ဟင်းရည်များများပါသော ဟင်းများကို ထမင်းနှင့်အတူတကွ စားလေ့ရှိပါသည်။ ပါဝင်ပစ္စည်းများနှင့် ချက်ပြုတ်နည်းပေါ် မူတည်ပြီး ○○ဂု၊ ○○ထမ်း၊ ○○ကျီဂယ်၊ ○○ဂျောင်းန်ဂိုးလ်ဟူ၍ ခေါ်ကြပါသည်။

ဂင်ချီသည် ကိုရီးယားလူမျိုးများအတွက် အနပ်တိုင်း မပါမဖြစ်သော အလွန် အရေးကြီးသော အစားအစာဖြစ်ပြီး၊ အရသာနှင့် အာဟာရ၊ သိမ်းဆည်းရ လွယ်ကူခြင်း စသည့် အချက်များနှင့် ပြည့်စုံသော အစားအစာဖြစ်ပါသည်။ မုန်လာဥဖြူ၊ တရုတ်မုန်ညှင်းဖြူ၊ သခွားသီး စသည့် အသီးအရွက်များကို ဆားဖြင့်နယ်ကာ နှပ်ထားပြီး ငရုတ်သီးမှုန့်၊ ကြက်သွန်ဖြူ၊ ကြက်သွန်မြိတ်၊ ဂျင်း၊ ငါးပိ စသည်တို့ကို အခြား ပါဝင်ပစ္စည်းများဖြင့် အနှစ်ဖြစ်အောင် နယ်ပြီး သိပ်ပါသည်။ ထို့နောက် ဗူးထဲ ထည့်ပိတ်ပြီး အပူချိန် တူညီသော နေရာ၌ အချိန်ကာလတစ်ခုကြာအောင် အချဉ်ဖောက်ပြီး စားရသော အစားအစာဖြစ်ပါသည်။ ဆောင်းရာသီတွင် မုန်ညှင်း စိုက်ပျိုး၍ မရသည့်အတွက် 11လပိုင်းကုန်~12လပိုင်း အစောပိုင်းတွင် ဂင်ချီအမျိုးမျိုးကို အကြာကြီးထားပြီး စားနိုင်အောင် အများကြီး သိပ်ကြပါသည်။ ၎င်းကို ‘ဂင်ဂျန်း(ဂင်ချီသိပ်ခြင်း)’ဟု ခေါ်ပါသည်။ ဂင်ချီသိပ်သည့်အခါ ပမာဏအများကြီး သိပ်သည့်အတွက် ရင်းနှီးသော ဆွေမျိုး၊ မိတ်ဆွေများ စုပြီး အတူတူ သိပ်ကြပါသည်။

ကိုရီးယားနိုင်ငံသည် နွေဦး၊ နွေ၊ ဆောင်းဦး၊ ဆောင်း 4ရာသီ သိသာထင်းရှားသော နိုင်ငံ ဖြစ်ပါသည်။ ရာသီအလိုက် လတ်ဆတ်ပြီး အရသာရှိသော သစ်သီးများ ထွက်ရှိပါသည်။ ယခုနောက်ပိုင်းတွင်မူ ဖန်လုံအိမ်စနစ် စိုက်ပျိုးခြင်းများလည်း ရှိလာသည့်အတွက် ရာသီ မဟုတ်သော်လည်း အသီးအနှံများကို အချိန်မရွေး စားသုံးနိုင်သော်ငြား အသီးဆိုသည်မှာ ရာသီချိန်တွင် စားသုံးခြင်းသည် အရသာအရှိဆုံး ဖြစ်ပါသည်။ အမိနိုင်ငံတွင် စားခဲ့သည့် အသီးများကို စားလိုပါက လျှေ့ာစျေးဆိုင်ကြီးများနှင့် ကုန်တိုက်များသို့ သွားရောက် ရှာဖွေကြည့်နိုင်ပါသည်။